Абай облысында 2026 жылғы көктемгі су тасқыны кезеңіне дайындық жұмыстары жүйелі түрде ж жатыр. Бұл туралы Өңірлік коммуникациялар қызметінде өткен баспасөз мәслихатында облыстың жұмылдыру дайындығы, аумақтық және азаматтық қорғаныс басқармасының басшысы Ақылжан Ақылбеков мәлімдеді.
Облыс аумағында 326 елді мекен бар, оның 64-і су басу қаупі бар аумаққа жатады. Бұл тізім Төтенше жағдайлардың алдын алу және жою жөніндегі ведомствоаралық мемлекеттік комиссия отырысында бекітілген.
– Қазіргі таңда бірқатар елді мекендерде су басу қаупі сақталып отыр. Биыл қабылданған инженерлік шаралардың нәтижесінде бірнеше елді мекенде қауіп толық жойылып, тағы біразында қауіп деңгейі айтарлықтай төмендетілді. Облыс әкімі 2026 жылғы су тасқыны кезеңіне арналған елді мекендерді инженерлік қорғау жоспарын бекітті. Жоспар аясында алдын алу шаралары қарастырылған. Қазіргі таңда олардың басым бөлігі облыс аудандарында толық орындалып, қалған бөлігі келесі жылға жоспарланды,- деді Ақылжан Ақылбеков.
Семей қаласында арықтар мен су бұру арналары тазартылып, жағалаулар нығайтылып, дамба және жаяу жүргіншілер көпірлері салынды. Аудан әкімдіктері қосымша алдын алу шараларын да жүргізді. Облыстағы гидротехникалық нысандар штаттық режимде жұмыс істеп тұр, су қоймаларында бос сыйымдылық жеткілікті, жағдай тұрақты бақылауда. Биыл авариялық жағдайлар тіркелмеген.
– Облыста сел қаупі бар аумақтар анықталып, ол жерлерде гидрометеорологиялық бақылау тұрақты жүргізіледі. Авариялық бригадалар дайындық режиміне қойылған. Қажет болған жағдайда өзендерде мұз жару жұмыстары жүргізіледі. Төтенше жағдай кезінде халықты орналастыру және қажетті техниканы тарту бойынша келісімдер жасалды,- деді спикер.
