Қазақстан Республикасы Мемлекеттік қызмет істері агенттігінің Абай облысы бойынша департаменті 2025 жылы мемлекеттік қызметтер көрсету сапасын бақылау бағытында атқарылған жұмыстың қорытындысын жариялады. Департамент өз құзыреті шегінде мемлекеттік қызмет көрсету сапасына Қазақстан Республикасының заңнамасына сәйкес мемлекеттік бақылау жүргізеді.
Өткен жылы департамент барлығы 32 бақылау шарасын өткізген. Оның 15-і жоспарлы тексеру болса, 17-сі жоспардан тыс тексерулер ретінде тіркелген. Нәтижесінде 2048 бұзушылық анықталып, негізгі кемшіліктер мына бағыттарда жиі кездескен: мемлекеттік қызмет көрсету тәртібін бұзу, қызмет көрсетуден негізсіз бас тарту, құжаттар толық болмаған жағдайда қызмет көрсету, сондай-ақ басқа да түрлі олқылықтар.
Тексерулер қорытындысы бойынша 10 қызмет алушының құқықтары қалпына келтірілген. Атап айтқанда, жүгінген азаматтарға атаулы әлеуметтік көмек тағайындалып, тиісті төлемдер жүргізілген. Сонымен бірге жоспарлы тексерулер аясында тағы 18 қызмет алушының құқығы қорғалып, бірқатар жағдайда жер учаскелерін жалға алу мерзімдері ұзартылған.
Сапаны бақылаудың тиімділігін арттыру мақсатында департамент қазіргі заманғы бақылау құралдарын, соның ішінде қызмет берушілердің ақпараттық жүйелері арқылы қашықтықтан мониторинг жүргізу тәсілін белсенді қолданған. 2025 жылы осы әдіспен мемлекеттік қызметтер туралы заңнаманың 15 мыңнан астам бұзушылығы анықталғаны көрсетілді.
Жұмыс қорытындысы бойынша қызмет берушілерге 72 ұсыныс енгізіліп, олардың толық орындалғаны айтылды. Бұзушылықтарға байланысты 14 қызметкер тәртіптік жауапкершілікке тартылған. Сонымен қатар 5 тұлғаға қатысты Әкімшілік құқық бұзушылық туралы кодекстің 465-бабы бойынша 9 хаттама толтырылған.
Департамент алдағы уақытта да мемлекеттік қызметтердің сапасын арттыру, анықталған кемшіліктерді жою және азаматтардың құқықтарын қорғау бағытындағы бақылау жұмыстарын жалғастыратынын мәлімдеді.
