Жылдың алғашқы тәулігінде қаламызда 31 сәби дүние есігін ашты. Олардың 16-сы қыз, ал қалған 15-і ұл екен.
Өмірге жаңа келген сәбилер бойынша қаламызда перинатальды орталық алда тұр. Мұнда жаңа жылдың алғашқы сағаттары соққан шақта 13 нәресте жарық дүниемен қауышты. Оның бесеуі ұл болса, сегізі қыз.
Одан кейінгі кезекте сол жағалаудағы №2 пер- зентхана тұр. Мұнда 10 сәби өмір есігін ашты. Алты қыз, төрт ұл.
Ал, биыл іргесі қаланғанына жарты ғасыр толатын №3 перзентхана үйінде 1 қаңтар күні 8 нәресте туылды. Оның алтауы ұл, екеуі қыз.
Жылқы жылында жарыса жарық дүниемен қауышқан бөбектердің алды қазір үйлеріне шығып үлгерді. Дәрігерлердің айтуынша, барлығының да денсаулығында ақау жоқ, бүгінде ата-аналарын қуанышқа бөлеп жатыр.
Жылқы жылы туған балалар терең пайым мен сараптауға бейім, әрбір ісін жүз рет өлшеп, бір рет кесетін парасатты болады деседі. Қазақтың батыры Қабанбай және ұлы ақын Жамбыл Жабаев та осы жылы туылғанын ескерсек, биылғы дүниеге келген нәрестелер арасынан еліміздің атын шығарар ұландар көп боларына сенім мол.
Өз тілшіміз
