Semeytany.kz — Үржар ауданында ауыл кәсіпкерлігін қолдайтын бағдарламалардың арқасында жаңа өндіріс орындары көбейіп келеді. Соның бірі — Бестерек ауылында іске қосылған түшпара өндіретін шағын цех.
Бестерек ауылының тұрғыны Сайлаугүл Сағатбекова «Ауыл аманаты» бағдарламасы аясында мемлекеттік қолдауға сүйеніп, жеңілдетілген несие алғаннан кейін цех жұмысын жолға қойған. Бүгінде кәсіпкер кәсібін кеңейтіп, ауылдың үш тұрғынын тұрақты жұмыспен қамтып отыр.
Өндіріс орнында дайындалатын өнімдер белгіленген сапа талаптарына сай әзірленіп, аудан тұрғындарына қолжетімді бағамен ұсынылуда. Мемлекеттік бағдарламаның игілігін көрген кәсіпкер алдағы уақытта өндіріс көлемін ұлғайтып, өнім түрлерін көбейтуді жоспарлап отыр.
Жалпы, Үржар ауданы бойынша «Ауыл аманаты» бағдарламасы аясында 2023 жылдан бері 70 жоба жүзеге асырылып, 80-нен астам жаңа жұмыс орны ашылған. Бағдарлама ауыл халқының әл-ауқатын арттырып, кәсіп бастаймын деген азаматтарға нақты мүмкіндік беріп келеді.
