Мен, Ауған соғысының ардагері ретінде көп жылдан бері пәтер кезегінде тұрған едім. Осы уақытқа дейін қалада қанша әкім болса, солардың барлығына жағдайымды айтып барғаныммен, шығарып салма сөз бен құрғақ уәдеден ары жағдайымды жүрекпен сезініп, көмек берген басшы болмады. Бірінші кезекте пәтер кезегінде тұрған Ұлы Отан соғысының ардагерлеріне, Ауған соғысына қатыс-қан интернационалист жауынгерлерге, көпбалалы жанұяларға пәтер бөлінеді дегенмен, іс жүзінде сол тәртіптің сақталатынына күмәнмен қарай бастағанымды жасырмаймын. Қала ішінде пәтер жалдап тұру отбасы мүшелерінің қатары толыққан сайын қаншалықты қиын екендігін мен сияқты пәтер ауыртпалығын бастан кешкен адам ғана түсінер. Осылайша, пәтерлі болу жайлы арманым орындалмай, үміттің жібі үзіле бастағанда, биылғы Жаңа жыл қарсаңында үлкен қуанышты хабар жетті. Қала әкімі Айбек Кәрімов жаңадан пайдалануға берілген, “Энергетик” кентіндегі үйден менің жанұяма пәтер бөліпті. Осы уақытқа дейін қалаға басшылық жасаған әкімдердің немқұрайлылығынан көңілім қалғандықтан ба екен кім білсін, әйтеуір, біз сияқты қарапайым адамдарға пәтер әділдікпен бөліне қояды дегенге сенуден қалған едім. Сол атқарушы билікке деген жоғалған сеніміміз қайта оянып, Жаңа жыл күні тілек айтқан жанұя мүшелерім мен туған туыстарымыз адам тағдырына түсіністікпен қарайтын, халыққа жақын әкім Айбек Кәрімовке разылықтарын білдіріп, қарт ата – анам сырттай ақ баталарын беріп жатты.
Бүгінгі таңда қаламыздың көркейіп, көп қабатты үйлердің көптеп салынуы, жылдар бойы қараусыз қалған жолдардың жөнделуі, көшеміздің жарықтандырылуы сияқты жарқын істердің жергілікті атқарушы биліктің жұмысының нәтижесі екендігі белгілі. Ал, «Қолжетімді баспана – 2020» бағдарламасының Семей қаласында шын мәнінде мұқтаж жандарға әділдікпен бөлінетіндігіне осылайша көзім жетіп, өзім сияқты пәтер ауыртпалығын бастан кешкен жанұяларға, жақсылықтан үміттеріңізді үзбеңіздер, халықтың жағдайын ойлайтын азаматтың амандығын тілейік дегім келеді.
Алдағы ақпан айында кеңес әскерлерінің Ауғанстан жерінен шығарылғанына 25 жыл толады. Ба- йырғы қаруластарым да қала басшысының маған пәтер беру жөніндегі шешімін зор ризашылықпен қабылдауда. Мен өзімнің және жанұямның атынан Айбек Мүталапханұлына атқарып отырған игілікті істеріңіз халықтың тарапынан лайықты бағасын алып, абырой биігінен көрсетсін дегім келеді.
Талғат ДҮЙСЕНБЕКОВ,
интернационалист жауынгер.
