Semeitany.kz — Абай облыстық мәслихатының кезекті XXXVII сессиясында өңірдің әлеуметтік-экономикалық даму қорытындылары қаралды. Жиында облыс әкімі Берік Уәли атқарылған жұмыстар туралы есеп беріп, жүзеге асып жатқан ірі жобалар мен алдағы жоспарларға тоқталды.
Өткен жылы облыстың негізгі әлеуметтік-экономикалық көрсеткіштері оң өсім көрсетті. Жалпы өңірлік өнім көлемі 3,9 триллион теңгеге жетіп, инвестициялар көлемі 616,2 миллиард теңгені құрады. Өнеркәсіп, құрылыс, ауыл шаруашылығы және көлік салаларында тұрақты даму сақталды.
Қазіргі уақытта өңірде «Аягөз – Бақты» теміржол желісінің құрылысы, Семей қаласында жаңа жылу электр орталығын салу, жел электр станциясын іске қосу және тау-кен байыту комбинатын ашу бағытындағы ірі инвестициялық жобалар жүзеге асырылып жатыр.
Облыста жалпы құны 4,4 триллион теңгені құрайтын 112 инвестициялық жоба қалыптастырылған. Биыл олардың 41-ін іске асырып, 3 мыңнан астам жаңа жұмыс орнын ашу жоспарланған. Сонымен қатар Семей қаласында арнайы экономикалық аймақ құру жұмыстары жүргізілуде.
Ауыл шаруашылығы өнімдерін терең өңдеуге бағытталған жобалардың бірі – «ЕвразияАгроСемей» ЖШС базасында салынып жатқан ет комбинаты. Оның құны 7,7 миллиард теңгені құрайды.
Өнеркәсіпті дамыту мақсатында Семейдегі «Өндіріс» индустриялық аймағының аумағы 96 гектардан 190 гектарға дейін кеңейтілді. Ал Мақаншы ауданында агроөнеркәсіптік кешенге бағытталған өңірлік индустриялық аймақ құрылуда.
Туризм саласында да бірқатар жобалар жүзеге асырылуда. Былтыр өңірде 8,9 миллиард теңгеге төрт туристік жоба іске қосылса, жағалау инфрақұрылымын дамытуға бөлінетін қаржы көлемі биыл 15,4 миллиард теңгеге дейін ұлғайды. Оның ішінде электр желілерін тарту мен Үржар әуежайының терминалын қайта жаңғыртуға Арнаулы мемлекеттік қордан 11,6 миллиард теңге қарастырылған.
Халықты сапалы ауыз сумен қамтамасыз ету мақсатында жалпы құны 24,9 миллиард теңгені құрайтын 32 жоба іске асырылды. Соның нәтижесінде бұрын ауыз су мәселесі шешілмеген елді мекендер сумен қамтылды.
Семей қаласында салынып жатқан төрт жолақты жаңа көпір құрылысы да қарқынды жалғасуда. Сонымен қатар «Абайға құрмет» акциясы аясында еліміздің өңірлері мен ұлттық компаниялардың қолдауымен әлеуметтік, мәдени және спорттық нысандар бой көтеруде.
Өңірде жүзеге асырылып жатқан «Қаладан ауылға» жобасы бойынша жыл соңына дейін 500 отбасын ауылдық жерлерге қоныстандыру жоспарланған. Қазіргі таңда 187 отбасы немесе 605 адам ауылдық елді мекендерге көшіп барған.
Сессия барысында облыстық бюджеттің орындалуы, өңірді дамыту бағдарламасының жүзеге асырылуы, денсаулық сақтау, экология, тұрғын үйді жаңғырту және әкімшілік-аумақтық құрылымға қатысты бірқатар маңызды мәселелер де қаралды.
