Semeitany.kz — Абай облысының әкімі Берік Уәли белгілі мүсінші, сәулетші, монументалды өнер саласының көрнекті өкілі Қазытай Нарысовпен кездесті.
Қазытай Сыздықұлы – Қазақстанның тарихи тұлғаларына арналған көптеген ескерткіштердің авторы. Оның еңбектері еліміздің әр өңірінде орнатылып, ұлттық мәдени мұраны дәріптеуге және тарихи сананы қалыптастыруға қызмет етіп келеді.
Белгілі мүсінші Абай облысындағы бірқатар монументалды өнер туындыларының авторы ретінде танымал. Оның белгілі еңбектерінің бірі – Семей қаласының Орталық саябағында орналасқан ұлы ойшыл, ақын Шәкәрім Құдайбердіұлына арналған ескерткіш. Бұл монумент сәулетші Шотаман Уәлихановпен бірлесіп жасалған.
Кездесу барысында Қазытай Нарысов өңірдің, оның ішінде Семей қаласының сәулеттік келбетін жақсартуға қатысты ұсыныс-пікірлерін жеткізді.
Облыс әкімі мүсіншінің ұлттық өнерді дамытуға қосқан үлесін атап өтіп, шығармашылық еңбегіне табыс тіледі. Кездесуде айтылған ұсыныстар мен бастамалардың назарға алынатынын айтты.
