Semeitany.kz – Абай облысында Қазақстан полициясы күніне арналған салтанатты шара өтіп, құқық қорғау органдарының қызметкерлері мен ардагерлеріне құрмет көрсетілді.
Семей қаласындағы Абай атындағы театрда ұйымдастырылған жиынға облыс әкімі Берік Уәли, облыстық Полиция департаментінің бастығы Эльдар Данияров, сала қызметкерлері мен ардагерлері қатысты.
Мерекелік шарада сөз сөйлеген облыс әкімі полиция қызметкерлерінің қоғамдағы маңызына тоқталып, елдегі тыныштық пен қоғамдық қауіпсіздікті қамтамасыз етудегі еңбектерін жоғары бағалады. Ол құқық қорғау саласында қызмет ету үлкен жауапкершілік пен кәсібилікті талап ететін абыройлы міндет екенін атап өтті.
Салтанатты жиын барысында көп жылдық адал еңбегі үшін бірқатар ардагерге «Абай облысына сіңірген еңбегі үшін» төсбелгісі табысталды. Сонымен қатар қоғамдық тәртіпті сақтауға қосқан үлесі үшін полиция қызметкерлері облыс әкімінің Алғыс хатымен марапатталды. Бұдан бөлек, Ішкі істер министрлігінің ведомстволық медальдары, төсбелгілері, Құрмет грамоталары мен алғыс хаттары тапсырылды.
Облыстық әкімдік тарапынан полиция органдарының материалдық-техникалық базасын нығайту жұмыстары жалғасуда. Биыл Полиция департаменті ғимаратында Жедел басқару орталығын құруға қаржы бөлінді. Жыл басынан бері қаржы лизингі арқылы 137 қызметтік автокөлік сатып алынған. Жыл соңына дейін тағы 97 көлік алу жоспарланып отыр.
