Semeitany.kz – Семей қаласында салынып жатқан жаңа әкімшілік-іскерлік орталық аумағында бірден үш маңызды нысанның құрылысы басталды. Құрылыс алаңдарын аралаған Абай облысының әкімі Берік Уәли жобалардың жүзеге асу барысымен танысты.
Алғашқы нысан – республикалық «Абайға құрмет» акциясы аясында Алматы қаласы тарту еткен Медиа орталық. Төрт қабатты ғимараттың жалпы ауданы 4839 шаршы метрден асады. Мұнда бейне және аудиостудиялар, монтаж бөлмелері, конференц-зал, кинозал, коворкинг аймақтары, медиа-кітапхана, демалыс орындары мен кафе орналаспақ. Сонымен қатар журналистер аллеясын салу жоспарланған.
Жаңа әкімшілік-іскерлік орталықта Шымкент қаласының сыйы ретінде бой көтеріп жатқан Шығармашылық орталығының құрылысы да қарқынды жүргізілуде. Үш қабатты ғимараттың ауданы 1210 шаршы метрден асады. Орталық 150 оқушыға арналған және музыкалық, хореографиялық, бейнелеу өнері бағыттары бойынша жұмыс істейді. Мұнда балалардың шығармашылық қабілеттерін дамытуға барлық мүмкіндік қарастырылады.
Облыс әкімі Павлодар облысының тартуы болатын Үстел теннисі орталығының құрылыс алаңына да барды. Жалпы ауданы 2580 шаршы метрден асатын екі қабатты спорт нысанында негізгі зал, медициналық және күзет кабинеттері, киім ауыстыру бөлмелері, жаттықтырушылар мен төрешілерге арналған кабинеттер, көрермендер трибуналары және басқа да қажетті орындар болады.
Берік Уәли жаңа әкімшілік-іскерлік орталық Семейдің заманауи келбетін қалыптастыратын маңызды жоба екенін атап өтті. Оның айтуынша, «Абайға құрмет» акциясы аясында басталған бұл құрылыстар өңірдің әлеуметтік, мәдени және спорттық инфрақұрылымын дамытуға серпін береді.
Жобаға сәйкес Семейдің оң жағалауында аумағы 1000 гектар болатын жаңа әкімшілік-іскерлік орталық салынады. Мұнда 3 миллион шаршы метрден астам тұрғын үй, 1,2 миллион шаршы метр әкімшілік және коммерциялық нысандар бой көтереді. Болашақта жаңа ауданда 75 мыңнан астам адам тұрады деп жоспарланған.
Қазіргі уақытта «Абайға құрмет» акциясы аясында Маңғыстау облысының қолдауымен Достық үйі, Солтүстік Қазақстан облысының сыйы Рәміздер алаңы, Ақтөбе облысының тартуы Жекпе-жек сарайы секілді нысандардың құрылысы жүргізілуде. Сонымен қатар еліміздің өзге өңірлері мен ұлттық компаниялар да Семейде әлеуметтік, мәдени және спорттық нысандар салуға атсалысуда.
