Semeitany.kz – Семей қаласындағы Абай атындағы театрда Мемлекеттік қызметшілер күніне арналған салтанатты шара өтті. Жиынға Абай облысының әкімі Берік Уәли қатысып, мемлекеттік қызмет саласында еңбек етіп жүрген мамандарды кәсіби мерекелерімен құттықтады.
Аймақ басшысы өз сөзінде мемлекеттік қызметтің қоғам мен билік арасындағы сенімді байланысты қалыптастыратын маңызды институт екенін атап өтті. Оның айтуынша, өңірде бүгінде үш жарым мыңнан астам мемлекеттік қызметші еңбек етіп, облыстың әлеуметтік-экономикалық дамуына үлес қосып келеді.
Салтанатты жиында бірқатар қызметкерлер мемлекеттік және ведомстволық марапаттарға ие болды. Облыстық Ішкі саясат басқармасының басшысы Жарқын Жұмаділов Қазақстан Республикасы Президентінің Алғысымен және «Барыс» төсбелгісімен марапатталса, облыстық қаржы басқармасының басшысы Гүлфайрус Серікболова «Үздік мемлекеттік қызметші» төсбелгісін алды. Сонымен қатар, ұзақ жылдар бойы мемлекеттік қызметте еңбек еткен азаматтарға «Мемлекеттік қызмет ардагері» төсбелгісі табысталды.
Шара барысында алғаш рет мемлекеттік қызметкерлердің ата-аналарына бала тәрбиесіндегі еңбегі үшін облыс әкімінің Алғыс хаттары берілді. Сондай-ақ, Абай облысы бойынша өткен «Үздік сапалы қызмет көрсетуші» байқауының жеңімпазы анықталып, бұл атаққа облыстық спорт және дене шынықтыру басқармасының бөлім басшысы Байарыстан Башенов ие болды.
Мерекелік кеш концерттік бағдарламамен жалғасты. Көрермендер алдында әнші Қанат Үмбетов өнер көрсетіп, жас драматург Жәнібек Әлікеннің табиғатты қорғау мен азаматтық жауапкершілік тақырыбын арқау еткен «Қарағай» спектаклі сахналанды.
Айта кетейік, өңірде мемлекеттік қызметтің кадрлық әлеуетін арттыру бағытындағы жұмыстар жалғасуда. Өңірлік кадр резерві жобасы аясында іріктелген 25 азаматтың 13-і мемлекеттік қызметке тағайындалған. Сонымен қатар, мемлекеттік грантпен білім алған үздік түлектерді конкурссыз жұмысқа орналастыру тетігі арқылы 40 жас маман мемлекеттік қызмет қатарына қабылданған.
