Semeytany.kz — Абай облысының әкімі Берік Уәлидің төрағалығымен өткен кеңейтілген аппараттық кеңесте көктемгі су тасқыны кезеңіне дайындық мәселесі қаралды. Сондай-ақ жиында агроөнеркәсіптік кешенді мемлекеттік қолдау және әлеуметтік маңызы бар азық-түлік тауарларының бағасын тұрақтандыру жайы талқыланды. Кеңеске басқарма басшылары мен өңірлік департамент жетекшілері қатысып, аудан-қала әкімдері бейнережимде қосылды.
Күн тәртібіндегі алғашқы мәселе бойынша Төтенше жағдайлар департаментінің бастығы Манарбек Шапағатов, «Қазгидромет» РМК ШҚО және Абай облыстары бойынша филиалының директоры Ляззат Болатқан, жұмылдыру дайындығы, аумақтық және азаматтық қорғаныс басқармасының басшысы Ақылжан Ақылбеков, сондай-ақ Су ресурстары және ирригация министрлігінің Су ресурстарын қорғау және пайдалануды реттеу комитетіне қарасты «Ертіс бассейндік су инспекциясы» РММ басшысы Медет Жәдігерұлы баяндама жасады.
ТЖД мәліметінше, өңірде су басу ықтималдығы бар аумақта 64 елді мекен орналасқан, бұл аумақта 42 мыңнан астам тұрғын тұрады. Қазіргі таңда 22 елді мекенде қауіп деңгейі едәуір төмендетілген. Ал «Қазгидромет» болжамына сәйкес, биылғы көктемде Ақсуат, Аягөз, Бесқарағай, Бородулиха, Жарма және Көкпекті аудандары жоғары тәуекел аймағында тұр.
Мұз кептелістерінің алдын алу мақсатында Ертіс және Үбі өзендерінің жекелеген учаскелерінде жарылыс жұмыстарын жүргізу жоспарланған. Осы бағыттағы шараларды нақтылау үшін арнайы комиссия Бородулиха ауданында көшпелі отырыс өткізген. Алдағы уақытта мұндай отырыстар Семей қаласында және Бесқарағай ауданында да ұйымдастырылмақ.
Су тасқыны күрделенген жағдайда жедел әрекет ету үшін облыста 2 285 адамнан тұратын жеке құрам, 888 техника, 33 жүзу құралы және 190 су сору құрылғысы дайындалған. ТЖД базасында 70 адамнан құралған арнайы үш топ жасақталған. Сонымен бірге Семей әуежайында «Қазавиақұтқару» АҚ-ның Ми-8 тікұшағы тұрақты кезекшілікте тұр. Азаматтық қорғау қызметтерінің дайындығын пысықтау үшін 27–28 ақпан күндері «Көктем-2026» республикалық командалық-штабтық оқу-жаттығуы өтеді.
Жиында аймақ басшысы аудан-қала әкімдеріне күштер мен құралдардың толық әзірлігін қамтамасыз ету, эвакуациялық пункттерді дайындау, қар шығару жұмыстарын күшейту, инерттік материалдар мен жанар-жағармай, азық-түлік және дәрі-дәрмек қорын алдын ала жинақтау бойынша нақты тапсырмалар берді. Сондай-ақ өзендердегі мұз жару жұмыстарының жоспарын әзірлеу, су өткізу құрылыстарын тазалау, уақытша автокөлік көпірлерінің дайындығын тексеру және жолдардағы су басу қаупін азайту шараларын қабылдау міндеттелді.
«Көктемгі су тасқыны – жыл сайын ерекше назар аударуды талап ететін маңызды мәселе. Тұрғындардың қауіпсіздігін қамтамасыз ету, инфрақұрылымның тұрақты жұмысын сақтау және төтенше жағдайлардың алдын алу – біздің басты міндетіміз», – деді облыс әкімі Берік Уәли.
