Жуырда Зайсан қаласына облыс орталығындағы С.Аманжолов атындағы Шығыс Қазақстан Мемлекеттік университетінің ректоры Әлібек Қуандықов бастаған бір топ ғалымдар арнайы келді. Меймандар сапар барысында М.Дәуленов атындағы мектеп-интернатта болып, ұстаздар қауымы және оқушылармен жүздесті.
{jcomments on}Ғалымдармен өткен жүздесу тың мағлұмат, тұшымды жаңалықтарға толы болды. Атап айтсақ, Зайсандағы білім шаңырағы базасынан аталмыш университеттің математика, физика және технологиялар факультетінің физика және технологиялар кафедрасы филиалының ашылуы салтанатты түрде өткізілді.
Мұндағы мақсат айқын – аудан мектептерінің ғылыми бағытта, университетпен тығыз байланыста жүйелі жұмыс жүргізуіне молынан мүмкіндік туғызу; мұғалімдердің біліктілігін арттыру арқылы бірлескен ғылыми жобалар мен зерттеу жұмыстарын іске асыру; педагогикалық іс-тәжірибелерді пайдаланып, аудан мектептері оқушылары арасында физика пәні бойынша олимпиадалар өткізу жөнінде тараптардың бірлескен қызметін ұйымдастыру. Сондай-ақ мектеп бітіруші түлектерді аталған университеттің мамандықтарына тарту, кәсіпке бағдарлау жұмысын жүзеге асыруда бірлесіп жұмыс жасау көзделді.
Әрине, бұл игілігі мол шараның аудан мектептері үшін тиімділігі зор болмақ. Осы орайда ғылыми бағыт бойынша жұмыс жүргізетін филиалға, әсіресе білім ордасындағы физика пәні кабинетіне жүктелген жауапкершілік те зор.
Салтанатты жиында сөз кезегін алған университеттің ректоры Әлібек Қуандықов және стратегиялық даму және ғылыми жұмыс жөніндегі проректоры Бауыржан Ерденбеков, университеттің физика және технология кафедрасының меңгерушісі Гүлсім Бектасова сөз сөйлеп, құттықтау тілектерін білдірді. Сонымен қатар мектептен ашылған филиалға ала келген сыйлықтарын, қажетті оқу құралдарын, оқулықтарды тарту етті.
Өз кезегінде мектеп-интернат директоры А.Жиенгелдинов аудандағы әріптестері атынан университет ректорына, ғалымдар мен оқытушыларға осындай елеулі қамқорлықтары үшін шынайы алғысын білдіріп, ризашылығын жеткізді.
Елбасы Н.Назарбаев жастарға арнаған бір сөзінде: «Біз сендер үшін білім беру мен ғылымның ең озық жүйесін жасаудамыз. Сендердің алдарыңнан ата-бабаларың армандап көрмеген ғаламат мүмкіндіктер ашылуда»,- деген еді. Бұл ретте зайсандық оқушылар да білім мен ғылымға құлаш ұруда зор жетістіктерге жетіп, тың игіліктерге кенелуде. Осы уақытқа дейін аудан әкімі Алмас Оңдақановтың бастамаларымен білім саласында да тың нәтижелер орын алды. Өскемендік жоғары оқу орны тарапынан облыс орталығынан шалғайдағы шекаралық аймақтағы ауданға арнайы филиал ашылуы – соның айқын көрінісі. Бұл аудан басшыларының ықпалымен өңірде жеткіншектердің болашағы үшін жасалған зор мүмкіндік екені белгілі.
Салтанатты шара барысында С.Аманжолов атындағы Шығыс Қазақстан мемлекеттік университетінің ректоры Ә.Қуандықов, аудан әкімінің орынбасары Д.Қалихан лента қию рәсімін жасады. Одан кейін ректор Әлібек Өсербайұлы мен мектеп-интернат директоры А.Жиенгелдинов өзара екі жақты келісімшартқа қол қойды. Сонымен қатар мектеп-интернаттың физика пәні кабинетіне математика, физика және технология факультеті кафедрасының филиалы тақтасы ілінді.
Аталмыш шараның жемісті болатыны сөзсіз. Зайсандық жастардың ертеңі үшін тағы бір елеулі шара осылайша сәтімен жүзеге асты.
Ардақты БӨЛДЕКБАЕВА,
«Семей таңы»
