Semeytany.kz — Абай облысында тұрғындардың қауіпсіздігін қамтамасыз ету мақсатында қар тазалау және шығару жұмыстары жүйелі түрде жалғасып жатыр. Коммуналдық және жол қызметтері елді мекендер мен автожолдарда күшейтілген режимде еңбек етуде.
Бесқарағай ауданының орталығы Бесқарағай ауылында 42 көшені қардан тазалау және кеңейту жұмыстарына 4 арнайы техника мен 8 жұмысшы жұмылдырылған. Жыл басынан бері ауыл аумағынан 4000 текше метр қар шығарылды. Канонерка, Баскөл, Малая-Владимировка ауылдық округтерінде де қар тазалау жүріп, аудан бойынша жалпы 10 780 текше метр қар сыртқа шығарылған. Сондай-ақ аудандағы 158 су өткізу құрылысының су ағарлары тазартылуда, ал төтенше жағдайдың алдын алу үшін 6 200 дана қапшық қоры дайындалған.
Көкпекті ауданында биыл қар мөлшері әдеттегіден көп. «Қазгидромет» дерегіне сүйенсек, қар қалыңдығы 60 сантиметрге дейін жетіп, жердің қату деңгейі 98 сантиметр болған. Аудандық, облыстық және республикалық маңызы бар жолдардағы жұмыстар тоқтаусыз жүргізілуде. Жалпы ұзындығы 500,6 шақырым жол желісіне қызмет көрсетіліп, қар тазалауға 5 тиегіш, 2 грейдер, 6 МТЗ тракторы және 4 КамАЗ тартылған. Бүгінге дейін 2000 текше метр қар шығарылды.
Бородулиха ауданында аумақтарды қардан тазалау және уақытылы шығару бекітілген кестеге сай күн сайын орындалып келеді. Көлік қозғалысының үздіксіздігін сақтау үшін күнделікті 2 автогрейдер, 4 тиегіш және 12 самосвал іске қосылған. Қыс басталғалы аудан аумағынан 28 500 текше метрден астам қар шығарылған.
Аягөз ауданында да қар күреу тұрақты түрде ұйымдастырылып, жол қауіпсіздігін қамтамасыз ету үшін күн сайын 12 арнайы техника жұмысқа тартылған. Қазіргі уақытқа дейін аудан бойынша 15 900 текше метр қар сыртқа шығарылды.
Үржар ауданында қалың қарға байланысты тазалау жұмыстары ерте басталып, тәулік бойы үздіксіз жүргізілуде. Аудан бойынша 47 арнайы техника жұмылдырылған, оның 10-ы республикалық маңызы бар автомобиль жолдарында қызмет атқаруда. Бүгінге дейін 3000 текше метрге жуық қар шығарылған.
Қазіргі таңда облыс аудандарында қарды шығару, жол жиегін кеңейту, су өткізу нысандарын тазарту секілді жұмыстар күн тәртібінен түскен жоқ. Мамандар ауа райы қолайсыз болған жағдайда да техникалар дайын тұрып, қауіпсіздікті сақтауға бағытталған шаралар жалғаса беретінін айтады.
Кілт сөздер: Абай облысы, қар тазалау, жол қауіпсіздігі, коммуналдық қызмет, қар шығару
