Semeytany.kz — Облыс әкімі Берік Уәли Абай атындағы әмбебап кітапханада жергілікті ақын-жазушылармен кездесіп, өңір руханиятының өзекті мәселелерін талқылады. Мұқағали Мақатаевтың туған күніне орай ұйымдастырылған басқосу еркін форматта өтті. Жиынға қала-аудандардан зиялы қауым өкілдері, айтыс ақындары, жазба ақындар, қаламгерлер қатысты.
Кездесудің ашылуында аймақ басшысы әдебиет пен мәдениет өкілдерінің қоғамдағы орнына тоқталып, Президент Қасым-Жомарт Тоқаевтың «Абай және XXI ғасырдағы Қазақстан» мақаласында Семейдің тарихи орталық ретіндегі маңызы арнайы атап өтілгенін еске салды. Берік Уәлидің айтуынша, Абай елі – руханияттың қазығы қағылған өңір, сондықтан қалам ұстаған қауыммен дәл осы күні жүздесуді жөн көрген.
Жиында өңірде мәдениет саласында қолға алынған бірқатар жұмыстар айтылды. Президент өкімімен ақын Төлеген Жанғалиев мәдениет саласындағы мемлекеттік стипендия иегері атанса, айтыскер ақын Әсем Ережеқызы «Айбоз» ұлттық әдеби сыйлығымен марапатталған. Сонымен бірге өткен жылы «Абай жолы» кітапханасы» сериясы аясында 25 ақын-жазушының еңбегі жарық көргені де сөз болды.
Аймақ басшысы алдағы уақытта облыста «Тарбағатай» дәстүрлі өнер театрын ашу жоспарда тұрғанын жеткізді. Сондай-ақ Қайым Мұхамедханұлының 110 жылдығы, Қабдеш Жұмаділовтың 90 жылдығы, Тұрсын Жұртбайдың 75 жылдығы лайықты деңгейде атап өтілетінін айтты.
Кездесуде Берік Уәли өңір жұртшылығына тағы бір жаңалықты жариялады. Оның айтуынша, Абай облысына арналған гимн жазу және заманауи жаңа әндерді қолдау мақсатында «Ұлылар елі» республикалық ән байқауы басталады. Байқау облыс әкімдігі мен мәдениет, тілдерді дамыту және архив ісі басқармасының қолдауымен өтеді. Жоба екі бағыттан тұрады: облысқа арналған гимн жазу және «Trend auen» бағыты бойынша жаңа музыкалық шығармалар.
Басқосуда зиялы қауым өкілдері де ұсыныс-пікірлерін білдірді. Олар елде жүзеге асып жатқан конституциялық реформалардың маңызын атап өтіп, жаңа Ата заң жобасын қолдайтындарын жеткізді. Аймақ басшысы бұл реформалар аясында Парламент құрылымына қатысты талқылаулар жүріп жатқанын айтты.
Жиын барысында Абай атындағы облыстық әмбебап кітапхананың директоры Мерей Қарт «Абай жолы» кітапханасы» жобасын таныстырса, Айтыс ақындары мен жыршы-термешілердің халықаралық одағының төрағасы Дәулет Сметов өңірдегі айтыс өнерін дамыту, жас ақындарды қолдау және ұйымның облыстық филиалының жұмысы туралы баяндады.
