Өткен аптаның бейсенбісінде Семей қалалық Достық үйінде шаһардағы этномәдени орталық мүшелерінің басын қосқан іргелі шара болып өтті. Қазақстан халқы Ассамблеясының 20 жылдығына орай өткізілген мерекелік жиынды қаламыздағы ТЖБ қызметкерлері ұйымдастырыпты.
{jcomments on}Ел бірлігі қашан да жырлауға лайық. Осы ретте сол елдің бейбіт өмірдегі қауіпсіздігі үшін күресетін Төтенше жағдайлар басқармасы қызметкерлері сынды ерекше мамандық иелерінің бұл құндылықты мақтан тұтуы тіптен жарасымды.
Аталмыш шара барысында ұлттық нақыштағы киімдерімен келген әр ұлттың өкілдері мен басқарманың сарбаздары қатар отырды.
Басқосуда биылғы жылы еліміз бойынша ерекше мәртебе беріле аталып өтілетін мерейтойлы даталар – Қазақ хандығының 550, Абайдың 170, Жеңістің 70 жылдығы жайлы да толғамды пікір, толымды ойлар айтылды. Көпшілік алдында баяндама жасаған «Айша Бибі» қалалық мәдени орталығы қоғамдық бірлестігінің төрайымы Айман Ибрайқызы тәуелсіздік алған жылдардан бергі ұлтаралық татулық пен келісім және қазақстандық патриотизмді нығайту жолындағы шаралар жайында кеңінен сөз сөйледі.
Шарада сонымен қатар Төтенше жағдайлар басқармасының қызметкерлері өнер көрсетіп, жиналған көпшілікке ән мен күйден тарту ұсынды. Мәселен, төтеншелік жас сарбаз Олжас Сапабаевтың домбырада шебер орындаған күйіне көпшілік ұзақ қол соқты.
— Біздің басқармада еңбек ететін жандардың барлығы да, шын мәнінде, өнерге жақын адамдар. Тек үнемі өрт сөндіру, селдің алдын алу сынды түрлі апаттарды жойып, тұрғындар қауіпсіздігін қырағы қамтамасыз ету үшін тәулік бойы қызмет орнында жүретін мамандарымыздың түрлі мәдени шараларға қатысуға уақыттары тапшы. Алайда бүгін, еліміздегі мерейлі даталарға орай, тағылымдық мән-мағынасы аса зор іргелі жиын өткізуді жоспарлаған едік, — деді пікір бөліскен Семей қалалық ТЖБ бөлімінің басшысы Дмитрий Алябьев.
Мерекелік көңіл-күйдегі басқосудың соңы этномәдени орталық өкілдері әзірлеген концерттік бағдарламамен жарасымды жалғастық тапты.
Қ. ӘЛІМБЕК,
Семей қаласы
