Өткен аптаның сенбісінде шаһарымыз бойынша жалпыхалықтық сенбілік жұмыстары бастау алды. Игілікті шараның «беташар рәсімі» қаланың ең көрікті жері – Орталық алаңнан басталды. Қала әкімі Айбек Кәрімов пен әкімдік өкілдері, «Нұр Отан» партиясының қалалық филиалы қызметкерлері, қалалық ардагерлер кеңесінің мүшелері, соғыс және еңбек ардагерлері мен БАҚ өкілдері де шырша көшеттерін отырғызу шарасына атсалысты.
{jcomments on}Семейдің Орталық алаңы ендігі аралықта тіптен көріктене түспек. Сәулеті келіскен алаңның Интернационал көшесімен іргелес тұсына бұл күні барлығы 35 түп канадалық шырша көшеттері отырғызылды. Алғашқы болып көк өскінді алаң іргесіне қондырған қала әкімі Айбек Кәрімов болды.
— Қазақта «Атаңнан мал қалғанша, тал қалсын» деген жақсы нақыл бар. Халқымыз көктемде тал көшетін отырғызуға ерекше мән берген. Бұл, бір жағынан, халқымыздың Наурыз мерекесімен де тамаша үйлесімділік тауып тұр. Сол себептен де жеріміз көгеріп, гүлдене берсін деген ниетпен сенбілік жұмыстарын осынау игі шарамен бастап отырмыз, — деді өз сөзінде Айбек Мүталапханұлы.
Бұл жолы халық арасында «ақ шырша» деген де атауы бар канадалық қылқан жапырақты шырша түрі егілді. Ерекше сұрып негізінен абаттандыру, көркейту мақсатында өсіріледі екен. Жылдың төрт мезгілінде де жап-жасыл қалпынан айнымай, айналасына ерекше сән береді. Бұтақтары жинақы әрі тығыз өскенімен, бойы екі метрден аспайды. Сол себепті де, көрнекті нысандарды жауып қалмайтындықтан, көбінесе алаңдар мен ғимараттар маңына егіледі. Аяз бен құрғақшылыққа да ерекше төзімді, қолайлы ортада 400-500 жыл жасайтын қасиеті тағы бар.
Жақсылыққа ырымдап көшет отырғызғандар арасында соғыс және еңбек ардагерлері де болды. Қалалық ардагерлер кеңесінің төрағасы Амантай Доғалақов бастаған қариялар да іргелі шарадан шет қалмай, өз қолдарымен бірнеше түп шыршаны қондырды.
Бұл — қаламыз бойынша жүргізілетін биылғы тазалық шараларының тек бастауы ғана. Алдағы уақыттарда да қала шырайын кіргізу мақсатында қомақты жұмыстар қолға алынбақ. Ол жайында пікір білдірген қалалық ТҮКШ, жолаушылар көлігі және автомобиль жолдары бөлімінің басшысы Ерған Қанафьев барлық көшелер бойынша сенбілік жұмыстары бастау алғанын жеткізді.
— Қазіргі күні қаламыздың барлық бөлігінде де көктемгі тазалық жұмыстары белсенді жүргізіліп жатыр. Қыстан қал-ған қалдықтар шығарылуда. Шаһар әкімдігінің ұйымдастыруымен өтіп жатқан сенбілікке барлық тұрғындар қатысуда. Оның ішінде мемлекеттік мекемелер мен ұйымдар, жекеменшік нысандардың үлесі көп. Барлық орталық көшелерді қарап шықтық. Қалалықтар ынтамен кірісуде. Бүгін қаланың негізгі көшелерін толықтай тазарту көзделуде. Ендігі аралықта қаланың шеткі көшелерінде сенбіліктер өткізуіміз керек. Бұл шара екі ай бойы жалғасатын болады. Ал келесі сенбіліктерде әрлеу, сырлау мен көшеттер отырғызу жұмыстарына басымдық беретін боламыз. Сондай-ақ жол жөндеу жұмыстарына да мән берілуде. Бұл бағытта бүгін 20-дан аса техника жұмылдырылуда. Атап айтсақ, «Гордорстрой» ЖШС фрезерлік, грейдерлік техникалармен орталық көшелерде жұмысты бастап кетті, — деді өз сөзінде Ерған Қабылсеитұлы.
Осылайша Орталық алаңның іргесінде көрікті шырша көшеттерінің көз тартар қатары пайда болды. Игілікті шараға үлес қосқан барша көпшілік қаламыздың да көркі дәл осылай күн санап арта берсін деп тілек білдірісті.
Қуаныш ЖОЛЫМБЕТ,
«Семей таңы»
