Өткен жұма күні Семей қаласының әкімі Айбек Кәрімов «Спартак» футбол командасының футболшыларын қабылдап, биылғы маусымдағы міндеттерді белгіледі. Аяқдопшылармен кездесуде бірінші кезекте жаңартылған команда құрамымен танысқан қала басшысы «Спартак» командасының бас жаттықтырушысы Алексей Петрушиннен ойыншылардың алдағы мау- сымға дайындығын сұрады. Бас жаттықтырушы Алексей Алексеевич Петрушин осы маусымда команда құрамы өзгертілгенін жеткізді.
{jcomments on}- Команда құрамы өзгертілді. Алайда футболшылардың дайындықтары жаман емес. Алғашқы ойында жеткен жеңісіміз ұжымның өздеріне деген сенімділігін күшейтті. Алдағы уақытта Премьер-лигаға өтуді жоспарлап отырған мықты-мықты командалармен кездесетін болады. Соған қызу дайындалудамыз, — деген Алексей Петрушин, — футболдың отаны саналатын Семей қаласында бұл ойынның үлкен дәстүрі қалыптасқан. Сондықтан командаға жергілікті ойыншылардың жетістіктері мен ел чемпионы атанғаны туралы ұдайы айтып отырамын. Соңғы он жылда бұл дәстүр біраз өзгерді. Біздің ендігі мақсатымыз – сол дәстүрді жандандырып, команданы Премьер-лигаға алып шығу. Команда жоғарғы лигада ойнаса деген жоспарымыз бар.
Бұл ретте қала әкімі Айбек Кәрімов жергілікті атқарушы биліктің футболға жақсы көзқараста екенін, соңғы жылдары командаға барлық мүмкіндіктер жасалып жатқанын айтты.
— Жергілікті биліктің көзқарасын жақсы білесіздер. Соңғы жылдары тұрғын үй мәселесін шешіп келеміз. Бұрын командаға бірде-бір пәтер, жатақхана берілмеген. Қазір бұл мәселе ретімен шешіліп келеді. Бұдан өзге командаға бұрын болмаған қосымша алаң пайдалануға берілді, — деген Айбек Кәрімов биылғы жылы «Спартак» командасына қала сыртынан арнайы жаттығу базасының құрылысы басталып, жыл соңына дейін аяқталуы жоспарланып отырғанын атап өтті.
Нысан жеке қаржы есебінен тұрғызылмақ. Екі қабатты ғимаратта бассейн, арнайы тамақтанатын орын сияқты барлық қажетті жағдай қарастырылмақ. Бұған қоса екі үлкен футбол алаңы салынбақ.
— Командаға барлық материалдық-техникалық жағдай жасалғанда ғана, нәтижелі ойын өрнегі көрсетіледі. Сондықтан атқарылып жатқан шаралардың барлығы тек жеңіс үшін. Жанкүйерлер сіздерден жеңіс күтеді. Сол үшін жақсы ойын өрнегін күтеміз. Денсаулықтарыңыз мықты болып, жарақат алмаңыздар. Сәттілік тілейміз, — деген тілегін де білдірді қала басшысы.
Кездесу соңында команда капитаны Сергей Куцов қолдау көрсетіп отырған қала әкіміне ризашылығын білдіріп, алдағы уақытта Премьер-лигаға өтуге бар күштерін салатындарын жеткізді. Сондай-ақ команда атынан «Спартак» футбол клубының жейдесін табыс етті. Кездесу соңында «Спартак» футбол командасының ұжымы қала әкімімен естелік суретке түсті.
Асан МЫРЗАХАНОВ,
“Семей таңы”
