Шәкәрім университетінде «Қауіпсіз болашақ: сталкингке қарсы ортақ жауапкершілік» тақырыбында ақпараттық-танымдық кездесу өтті. Маңызды басқосу қоғамда жиі назардан тыс қалып жататын, алайда жеке тұлғаның психологиялық саулығы мен қоғамдық қауіпсіздікке тікелей қауіп төндіретін сталкинг мәселесін кеңінен талқылауға арналды.
Іс-шараның басты мақсаты – сталкингтің мәнін ашып көрсету, оның зорлық-зомбылықтың бір түрі екенін түсіндіру, білім алушылар арасында құқықтық және психологиялық сауаттылықты арттыру, жеке шекараны құрметтеу мәдениетін қалыптастыру және бұл құбылыстың алдын алуда қоғамның ортақ жауапкершілігін нығайту.
Кездесу университеттің Жастарды әлеуметтік қолдау және дамыту орталығының басшысы, PhD докторы, қауымдастырылған профессор Арайлым Оразғалиеваның ұйымдастыруымен өтті. Жиынға мемлекеттік органдар мен қоғамдық ұйымдардың, құқық қорғау саласының және әлеуметтік қызмет құрылымдарының өкілдері қатысып, өз тәжірибелерімен бөлісті.
Абай облысы әкімінің гендерлік теңдік мәселелері жөніндегі штаттан тыс кеңесшісі Арайлым Әлімжанова гендерлік теңдік қағидаттарын нығайту және зорлық-зомбылыққа нөлдік төзімділік мәдениетін қалыптастырудың маңыздылығына тоқталды. Ол сталкингтің көбіне елеусіз басталып, уақыт өте келе психологиялық қысымға, қорқытуға және жүйелі қудалауға ұласатынын атап өтті.
Абай облысы мәслихатының депутаты, өңірлік бала құқықтары жөніндегі уәкіл Эльзира Солтабаева Қазақстан Республикасы Үкіметінің «2026–2030 жылдарға арналған “Қазақстан балалары” тұжырымдамасын бекіту туралы» қаулысының жобасына тоқталып, балалар мен жасөспірімдердің қауіпсіздігін қамтамасыз ету – мемлекеттік саясаттың басым бағыттарының бірі екенін жеткізді.
Семей қаласының отбасын және тұрмыстық зорлық-зомбылық құрбандарына қолдау көрсету орталығының директоры Назым Шақаева зорлық-зомбылықсыз қоғам құру жолындағы практикалық тәжірибелерімен бөлісіп, қыздар мен әйелдердің құқықтарын қорғауда қолдау орталықтарының рөліне ерекше назар аударды. Ал «Ана үйі» қоғамдық қорының координаторы Айнагүл Нұртазина қиын жағдайға тап болған жас аналарға көрсетілетін кешенді көмектің маңызын түсіндірді.
Абай облысы мәслихатының депутаты, «Эйкос» ЖШС даму бойынша директоры Анжела Маслова зорлық-зомбылыққа нөлдік төзімділікті қалыптастырудағы депутаттық корпус пен жергілікті атқарушы органдардың рөлі жайлы, ал Семей қаласының отбасылық-тұрмыстық зорлық-зомбылыққа қарсы күрес бөлімінің бастығы, полиция майоры Айнұр Қабдылқақова мәжбүрлі некеге итермелеу, сталкинг және тұрмыстық зорлық-зомбылық үшін қарастырылған қылмыстық және әкімшілік жауапкершілік туралы кеңінен баяндады. Бұл бағыттағы заңнамалық өзгерістер мен жауапкершілік шаралары жастардың құқықтық санасын арттыруға бағытталғаны айтылды.
Өңірлік психологиялық қолдау әдістемелік орталығының әдіскері Балжан Әсетова психологиялық шекара, келісім (consent) ұғымы және жасырын зорлық-зомбылық түрлері туралы мазмұнды баяндама жасап, жастарды өз шекарасын анық белгілеп, өзгенің шекарасын құрметтеуге шақырды.
Кездесу барысында қатысушылар сталкингтің тек жеке адамның мәселесі емес, бүкіл қоғамның қауіпсіздігіне әсер ететін әлеуметтік құбылыс екенін терең түсінді. Жастар ашық пікір алмасып, өздерін мазалайтын сұрақтарға жауап алды.
Осындай мазмұнды жиындар студенттердің құқықтық мәдениетін арттырып қана қоймай, қауіпсіз әрі саналы орта қалыптастыруға негіз қалайды. Қауіпсіз болашақ – әрқайсымыздың ортақ жауапкершілігіміз. Ал зорлық-зомбылыққа қарсы нөлдік төзімділік ұстанымы – өркениетті қоғамның басты қағидаты болуы тиіс.
Айта кетерлігі, Шәкәрім университеті еліміздегі жоғары оқу орындарының арасында алғашқылардың бірі болып студенттерге арналған «Үнсіз қалмау: Сталкингке қарсы күрес» жадынамасын жарыққа шығарды.
Шәкәрім университетінің баспасөз қызметі
