Бүгін Абай облысында жетекші қоғамдық-саяси күштердің қатысуымен «Әділетті және Прогрессивті Қазақстанның Халықтық Конституциясы үшін!» атты Жалпыұлттық коалиция аясында өңірлік коалиция мүшелерінің отырысы өтті. Оның құрамына бес жетекші саяси партияның, сондай-ақ өңірдегі қоғамдық ұйымдардың өкілдері енді.
Отырысқа қатысушылар Жаңа Конституция жобасы Күшті әрі Әділетті Қазақстан құрудың берік іргетасына айналып, саяси жүйе архитектурасын қоғамның жаңа сұранысына сай түбегейлі жаңғыртатынын атап өтті. Бұл бастама биліктің барлық тармағының тұрақты әрі үйлесімді жұмысын қамтамасыз етіп, азаматтардың мемлекетті басқару ісіне қатысу мүмкіндігін кеңейтеді және елдің орнықты дамуына жол ашады.
Өңірлік коалиция жетекшісі, мәслихат төрағасы Шалқар Байбеков өз сөзінде: «Жаңа Конституция – еліміздің болашақ даму бағытын айқындайтын стратегиялық құжат. Ол әділеттілік қағидаттарына негізделген жаңа саяси мәдениетті қалыптастырып, мемлекет пен қоғам арасындағы сенімді нығайтады. Біздің міндетіміз – осы тарихи шешімнің маңызын әрбір азаматқа түсіндіру», – деді.
Абай облысының Қоғамдық кеңесінің төрағасы Мейрамхат Айнабеков: «Конституциялық өзгерістер – бұл тек құқықтық түзетулер емес, бұл – қоғамның сапалы жаңғыруы. Ашықтық, әділдік және жауапкершілік қағидаттары өңірлік деңгейде де нақты істер арқылы көрініс табуы тиіс», – деді.
Сондай-ақ отырыс барысында «Aуыл» партиясы филиалының төрағасы Қайрат Смағұлов, «Қазақстан Халық партиясы» қоғамдық бірлестігі филиалы төрағасының міндетін атқарушы Ерлан Кенесбаев, «Respublica» партиясы Абай облыстық филиалының төрағасы Алмас Айтмұқаш, «Ақ жол» партиясы филиалының өкілі Ермек Абильмажинов, Абай облысы бойынша «AMANAT» партиясы жанындағы «Жастар Рухы» жастар қанатының төрағасы Темірлан Бақтияров, сондай-ақ коалиция мүшелері сөз сөйледі. Әлихан Бөкейхан университетінің проректоры Айрат Базенов академиялық қауымдастық атынан пікір білдіріп, жаңа конституциялық өзгерістердің құқықтық мемлекет қағидаттарын нығайтудағы рөлін атап өтті.
Кездесуге қатысушылар Жаңа Конституция жобасы мемлекеттің саяси жүйесін одан әрі жаңғыртуға, әлеуметтік кепілдіктерді күшейтуге, кәсіпкерлікті қолдауға, ғылымды, мәдениетті және ұлттық құндылықтарды дамытуға бағытталған стратегиялық бағдарға толық сәйкес келетінін атап өтті. Ұсынылып отырған өзгерістер азаматтардың әл-ауқатын арттыруға бағдарланған мемлекеттік институттардың неғұрлым тұрақты әрі тиімді моделін қалыптастыратыны баса айтылды.
Өңірлік коалиция мүшелері еліміздің институционалдық жаңғыру жолында маңызды кезеңнен өткеніне тоқталды. Атап айтқанда, «Күшті Президент – ықпалды Парламент – есеп беретін Үкімет» формуласының нығаюы, Конституциялық Соттың жұмыс істеуі, заңсыз шығарылған активтердің мемлекетке қайтарылуы, ұлттық ресурстарды әділ бөлу қағидатының күшеюі – әділдік пен теңдікке негізделген жаңа саяси мәдениеттің нақты көрінісі екені айтылды. Барлық шешімдер әділдік, теңдік және болашақ ұрпақ алдындағы жауапкершілік құндылықтарына сүйенетіні атап өтілді.
Сөз сөйлеген өңірлік коалиция мүшелері осы шешуші кезеңде Жаңа Конституцияны қабылдаудың тарихи маңызын халық арасында кеңінен түсіндіру үшін облыстағы жетекші қоғамдық-саяси күштердің бірлесуі аса маңызды екенін жеткізді.
Абай облыстық коалициясының құрамына саяси партиялардың өңірлік құрылымдары, облыстық қоғамдық бірлестіктер, мәслихат депутаттары, ғылыми және сарапшылық қауымдастық өкілдері, кәсіподақ ұйымдары, салалық қауымдастықтар мен жастар бірлестіктері енгені атап өтілді. Бұл – өңірдегі белсенді әрі беделді азаматтарды біріктірген кең ауқымды алаң.
Жуырда коалиция мүшелері облыс аумағында ауқымды түсіндіру жұмыстарын бастайды. Алдағы референдум қарсаңында ашық диалог ұйымдастыру, азаматтардың саналы түрде қатысуына жағдай жасау мақсатында еңбек ұжымдарымен, сарапшылар қауымымен және тұрғындармен кездесулер өткізу жоспарланып отыр. Сонымен қатар шалғай елді мекендер де назардан тыс қалмайды. Себебі әрбір қазақстандық азаматтың дауысы – ел болашағы үшін шешуші мәнге ие.
