Semeytany.kz — Бүгін Абай облысының әкімі Берік Уәли «Қазпошта» АҚ Абай облыстық филиалының директоры Нұрдәулет Лесбаевпен кездесті. Кездесуде өңірдегі пошта-логистикалық, қаржылық және агенттік қызметтердің дамуы, халыққа көрсетілетін сервистер сапасын арттыру және филиал инфрақұрылымын жаңғырту мәселелері сөз болды.
Аймақ басшысы мен филиал жетекшісі тұрғындарға көрсетілетін қызметтердің қолжетімділігі мен тиімділігін көтеру, соның ішінде цифрлық сервистерді кеңейту бағытындағы жұмысты күшейту қажеттігін атап өтті.
Қазір «Қазпошта» филиалы облыс тұрғындарына пошта, логистика, қаржы және мемлекеттік қызметтердің кең ауқымын ұсынып отыр. Өңірде 83 пошта бөлімшесі жұмыс істейді: оның 8-і Семей қаласында орналасқан, сондай-ақ 7 аудандық пошта байланыс торабы бар. Ауылдық елді мекендерде 75 бөлімше қызмет көрсетіп, 14 мыңнан астам ауыл тұрғыны қамтылған. Филиалда жалпы 546 қызметкер еңбек етеді. Алдағы уақытта Семей қаласындағы бөлімшелер санын арттыру жоспарланып отыр.
Кездесу барысында бірқатар өзекті түйткіл де көтерілді. Атап айтқанда, автопарктің 50 пайыздан астамының тозғаны және кейбір пошта нысандарына күрделі жөндеу қажет екені айтылды.
Облыс әкімі тұрғындарға көрсетілетін қызмет сапасын арттыру, цифрлық сервистерді дамыту және пошта инфрақұрылымын кезең-кезеңімен жаңарту жұмыстары жалғасатынын жеткізіп, кездесуде айтылған ұсыныс-пікірлер назарға алынатынын мәлімдеді.
