Semeytany.kz — Қарауыл ауылында шығармашылық қауым өкілдерімен «Әділетті және прогрессивті Қазақстанның халықтық Конституциясы үшін» тақырыбында мазмұнды кездесу өтті.
Жиынды аудандық Мәдениет үйінің директоры Лаура Орынғожина жүргізіп, Конституцияның ел дамуы мен қоғам тұрақтылығын қамтамасыз етудегі рөліне тоқталды. Сондай-ақ 15 наурыз күні өтетін референдумның тарихи маңызы мен әр азамат үшін жауапкершілігі жоғары екенін атап өтті.
Кездесу барысында Л.Орынғожина: «Конституция – мемлекетіміздің берік іргетасы. Әділетті әрі прогрессивті қоғам құру – баршамыздың ортақ мақсатымыз. Алдағы референдум – ел болашағына бейжай қарамайтын әр азаматтың жауапты таңдауы. Біз мәдениет саласының өкілдері ретінде халыққа дұрыс ақпарат жеткізіп, ұлттық бірлікті нығайтуға үлес қосуымыз қажет», – деді.
Жиында мәдениет саласының қызметкерлері де өз ойларын ортаға салып, ұсыныстарын айтты. Қазақстан Республикасына еңбегі сіңген мәдениет қызметкері, «Шапағат» медалінің иегері, Абай ауданының Құрметті азаматы, әнші Тамара Көзбаева алдағы өзгерістердің мәніне тоқталып, референдумды ел болашағын айқындайтын маңызды қадам ретінде бағалайтынын жеткізді.
Кездесу ашық диалог форматында өтіп, қатысушылар ел тағдырына қатысты мәселелерге бейжай қарамайтындарын білдірді.
