Көкпекті аудандық мемлекеттік зейнетақы төлеу орталығы ұжымы ауданда, облыста болып жатқан мәдени іс-шаралардан тыс қалмайды. Мекемеде бірін-бірі түсініп, бір жеңнен қол, бір жағадан бас шығаратын ұжым қалыптасқан.
{jcomments on}Осындай бірлік пен ынтымақтастық кәсіби міндеттерін орындауға жағымды әсер етіп, қызметте де жақсы көрсеткіштерге жетуге жетелейді. Жуырда Мемлекеттік зейнетақы төлеу орталығының Шығыс Қазақстан облыстық филиалы өткізген «Достық» фестиваліне аймақтағы әр ауданнан 14 команда қатысты. Бұл мәдени шара филиал директоры Ж.Өмірғалиеваның бастамасымен Қазақстан халқы Ассамблеясының жиырма жылдығы қарсаңында ұйымдастырылды. Фестиваль барысында ұлттық киім үлгілері, тағам түрлері және ұлттық ән-би сарапшылар сынына салынды. Көкпекті аудандық мемлекеттік зейнетақы төлеу орталығы ұжымы елімізде тұрып жатқан түрік ұлты өкілдерінің салт-дәстүрін көрсетті. Орталық мамандары Медет Сейпилов, Алуа Тайрова, Зарина Ратаевалар түрік халқының салт-дәстүрін елден ерекше көрсетіп, бірінші орынға тігілген бәйгені жеңіп алды. Мекеме басшысы Жібек Жадрина:
— Сайлауалды науқаны кезінде еліміздегі ұлтаралық татулықты дәріптеу үшін жасалған шара өз мақсатына жетті. Фестивальға қатысқан ұжым мүшелері сенімді ақтады. Олар қызметте де, өнерде де көкпектіліктердің жеңісті қолдан бермейтіндіктерін көрсетті. Біз осындай ұйымшылдықпен алдағы болатын сайлауға бір кісідей қатысамыз, — деді.
Халыққа қалтқысыз қызмет ететін орталық мамандары өз істеріне әрқашан да зор жауапкершілікпен қарайды. Кеңсе іші де, ауласы да мұнтаздай таза. Келіп-кетуші аудан тұрғындары, мекеме қызметін пайдаланушы зейнеткерлер ибалы қыздар мен сыпайы жігіттердің жұмысына алғыстарын айтуда.
Қайрат МАЛГАЖДАРОВ,
Көкпекті ауданы.
