Өткен жексенбіде, яғни 12 сәуір күні, Абай ауданында қалыптасқан су тасқыны қаупіне байланысты табиғи сипаттағы төтенше жағдай жарияланған болатын. Шаған өзенінің тасып кетуі салдарынан, Тоқтамыс ауылына баратын жергілікті маңызы бар 1,5 шақырым жол және көпір бүлінген.
{jcomments on}Ал Саржал ауылы әкімі Ұлан Өміртайдың айтуынша, ауыл тұсынан ағып өтетін Шаған өзені арнасынан асып кетіп, ауылдың шеткі екі көшесіндегі 1 үйдің ішіне және 56 үйдің ауласына су кірген. Орын алған табиғи апаттың салдарын жоюға бүкіл халық жұмылған. Бүгінгі таңда Саржал ауылында жергілікті атқарушы органның 38 бірлік техникасы мен 123 адам жұмыс істеп жатыр. ШҚО ТЖД-дан 4 машина мен жеке құрамнан 27 адам, ШӨАЖҚЖ-дан 3 бірлік техника мен 13 адам жұмыс жасауда. Жалпы жиыны 43 техника мен 300 адам жұмылдырылған. Саржал ауылы жағынан өзеннің арнасы бұрылып, ұзындығы 1 шақырым болатын жағалауға биіктігі төрт-бес қатар болатын 8000 қап инертті материалдар қойылып, бекітілген.
Қазіргі таңда табиғи апаттан келген шығындар есептелуде, апат салдарына байланысты нақты көмектер көрсетілмек.
Бұлбұл ӘНУАРБЕКҚЫЗЫ,
«Семей таңы»
