«Дауыс» қоғамдық байқаушылар коалициясы бастамасымен Ақсуат ауданында тәуелсіз бақылаушыларға арналған семинар өтті. Іс-шараның мақсаты – алдағы саяси науқан алдында бақылаушылардың құқықтық сауаттылығын арттыру және олардың жұмысын заң талаптарына сәйкестендіру.
Семинарды коалицияның тәуелсіз байқаушылар капитаны Динара Қыдырбекова жүргізді. Ол электоралдық үдерістің негізгі қағидаттарын түсіндіріп, бақылаушылардың құқықтары мен міндеттерін нақтылады. Сондай-ақ сайлау учаскесіндегі тәртіп, дауыс беру рәсімінің ашықтығы мен әділдігін қамтамасыз ету тетіктері талқыланды.
Кездесу барысында заң бұзушылықтарды анықтау, тіркеу және тиісті органдарға хабарлау тәртібі түсіндірілді. Қатысушыларға нақты мысалдар ұсынылып, тәжірибелік жағдаяттар арқылы әрекет алгоритмі көрсетілді.
Семинарда дауыс беру күніндегі іс-қимыл жоспары кезең-кезеңімен қарастырылды. Учаскенің ашылуынан бастап, бюллетеньдерді санау және қорытынды хаттамалармен жұмыс істеуге дейінгі рәсімдер түсіндірілді. Сонымен қатар құжаттарды рәсімдеу тәртібі мен комиссия мүшелерімен өзара әрекет мәдениеті айтылды.
Кездесу интерактив форматта өтті. Қатысушылар сұрақтарын қойып, нақты жауап алды. Даулы жағдайларда заң аясында әрекет ету қажеттігі ерекше атап өтілді.
Ұйымдастырушылардың айтуынша, мұндай оқыту шаралары қоғамдық бақылау институтын күшейтіп, азаматтардың сайлау үдерісіне деген сенімін арттыруға бағытталған.
