Бүгінде елдік мүдде жолында еңсерілер іс көп. Саяси-экономикалық тұрғыда дамудың бағыт-бағдары айқындалған қазіргі тұста, руханилық пен философиялық мәселелерге де жете көңіл бөлу қажет. Себебі өзіндік дүниетанымы, ұлт ретіндегі болмысы болмаған ұрпақ сөз жоқ өзге ұғым, бөтен түсініктің соңында кетуі бек мүмкін. Сондай-ақ мемлекетшілдік қасиеттер, жас буын бойында тек ұлттық көзқарас нығайған тұста ғана, бекем болмақ. Бұл ойлар аптаның сейсенбісінде Семейдегі іргелі жоғары оқу орны ҚазИГЗУ-де өткен Қазақстан халқы Ассамблеясы жылы және Қазақ хандығының 550 жылдығына арналған халықаралық ғылыми-тәжірибелік конференция барысында айтылып, ғалымдар арасында талқыға түсті.
{jcomments on}Аталмыш ауқымды шараға тек еліміздегі ғана емес, әлемдік деңгейдегі ғалымдар мен зерттеушілер де жиналған екен. Атап айтсақ, философия ғылымдарының докторы, академик, ҚР ҰҒА мүшесі, ҚР техника және ғылымға еңбегі сіңген қайраткер, Ш.Уәлиханов атындағы сыйлықтың иегері Әбдімәлік Нысанбаев, философия ғылымдарының кандидаты Уәлихан Төлешов, Әлемдік экономика және саясат институтының оқытушысы, заң ғылымдарының докторы, Қытай коммунистик партиясы негізіндегі орталық комитеттің партиялық мектебінің мүшесі Янгянг Лю, және Германияның Бонн қаласынан келген профессор, SES сарапшы қызметкері Йоханес Штикель сынды бірқатар оқымыстылар бар. «Ұлттық философия және жаңа дүниетанымдық парадигмалар» тақырыбын өзек еткен конференция барысында жиналған ғалымдар философия, тарих, филология, саясаттану және заң ғылымдары бойынша баяндамалар жасады.
Өткізіліп отырған ғылыми-тәжірибелік конференцияның мақсаты айқын — рухани-мәдени, экономикалық-әлеуметтік, ғылыми-техникалық даму мәселелерін айқындау, ұлттық интеллектуалдық мәдениетті, философия негіздері шеңберіндегі өзекті жайттарды бірлесіп талқылау болатын.
— Бұл іргелі шараның еліміздің басқа қалаларында емес, Семей шаһарында өткізілуінің өзіндік мәні бар. Себебі Абай мен Шәкәрім тәрізді ақыл-ой алыптары қалыптастырған қазақы дүниетаным негіздері мен ұлттық философия осы топырақта қайта түлеген болатын. Бұл түсініктердің бүгінгі күндері маңыздылығы артып отыр. Себебі қазіргі жаһандану үрдісінде тек әлеуметтік-экономикалық дамуға ғана емес, ұлттық болмыс пен дүниетанымға да арқа сүйеу қажет. Біз бүгін осы тақырыпта университеттің студенттері алдында лекциялар оқыдық, олармен пікір алыстық. Ой бөлістік. Байқағаным — ҚазИГЗУ студенттері пәлсафалық ілімге аса ынталы. Білуге деген құштарлықтары зор әрі өзіндік айтар ойлары мен ұстанымдары қалыптасып үлгеріпті. Мен осыған қуандым. Бұл, бір жағынан, университет қабырғасындағы білім сапасының да көрсеткіші дер едім. Ал бүгінгі ғылыми-тәжірибелік конференцияны ұйымдастырып отырған университет ректоры Шырын Құрманбаеваға және оқытушылар құрамына айтар алғысым шексіз, — деді Алматыдан келген академик Әбдімәлік Нысанбаев.
Конференцияның ашылу салтанатынан соң ғалымдар баяндамаларына кезек берілді. Атап айтсақ, ұлттық мемлекеттіліктің қайнар көздерінен қазіргі тәуелсіздікке дейінгі аралықты қамтитын ұлттық философия, тіл, мәдениет, экономикалық дамудың ұлттық үлгісі, заң ғылымдарының қазіргі мәселелері тақырыбында тұшымды ойлар қозғалып, ғалымдардың ой-пікірі ортаға салынды.
Қуаныш ЖОЛЫМБЕТ,
«Семей таңы»
