Семей қаласындағы Шугаев көшесінде орналасқан «Бала Парк» балалар ойын-сауық орталығында өрт шықты. Алдын ала мәлімет бойынша, хабарлама 3 наурыз күні сағат 19:10-да түскен. Оқиға орнына жедел қызметтер мен полиция барған, келушілер мен орталық қызметкерлері эвакуацияланып, аумақ қоршауға алынған.
Қала әкімдігі таратқан мәліметке сәйкес, өрт кешкі сағат тоғыз шамасында оқшауланған. Адам шығыны жоқ. Семей қаласының әкімі Әділет Қожанбаевтың айтуынша, 6 адам жедел жәрдем көмегіне жүгінген, олардың бесеуі үйлеріне жіберілген. 2007 жылы туған бір қыз бала ауруханаға жеткізіліп, жағдайы тұрақты деп бағаланған.
Төтенше жағдайлар қызметінің мәліметінше, өртті сөндіруге 120 адам мен 21 техника жұмылдырылған. Құтқарушылар нысанға 6 минутта жеткен. Ашық жалын салдарынан ғимарат шатырының бір бөлігі құлаған. Оқиға басталған сәтте іште болған адамдар өздігінен сыртқа шығып үлгерген. Сондай-ақ жедел штаб құрылып, ТЖМ-нің жедел желісі іске қосылған.
Абай облыстық денсаулық сақтау басқармасының ақпараты бойынша, медициналық көмекке жүгінгендердің үшеуі ересек, үшеуі бала. Бір адам иіс газынан уланып, ауруханаға жатқызылған. Екі бала тексерістен кейін үйлеріне жіберілген. Қазіргі уақытта жаңа өтініштер тіркелмегені хабарланды.
Қазір өрттің шығу себебі мен келтірілген шығын көлемі анықталып жатыр. Оқиға орнында бала құқықтары жөніндегі өңірлік уәкіл де жұмыс істеп жатқаны хабарланды.
