Күннің жексенбісіне қарамастан, қала әкімі Айбек Кәрімов шаһардың бірқатар аудандарын аралап, қалаішілік жолдардың жөнделуін, сенбіліктен кейінгі қала көшелерінің тазалығын көрді. Осы ретте шаһар басшысы бірқатар бөлім басшыларына тапсырмалар да жүктеді.
{jcomments on}Қала әкімі алдымен Қабанбай батыр көшесінің 72-ші ықшам ауданы аумағына аялдап, бұл жердің тазалығын сынға алды. Семейде екі айлық тазалық айлығы жарияланған болатын. Алайда екі сенбілікті өткізген семейліктерге қала басшысының көңілі толмады. Шаһар басшысы әсіресе қаладағы жеке кәсіпкерлердің салғырттығын сынға алды. Қала тазалығына кәсіпкерлердің де жұмыла кірісуі керектігін атап өтті. Әлбетте, жұмыла кіріскенде, өзіне тиесілі аумақтың тазалығын сақтау. Осындай жауапкершілік арқылы шаһар көріктенуіне үлес қосу. Бұл ретте қала әкімі өзінің жеке аумағының тазалығына бей –жай қарағандарға тек ескерту жасап қана қоймай, арнайы рейд жүргізу қажет екенін атап өтті.
— БАҚ өкілдерімен бірлесе осындай жауапсыз әрбір кәсіпкерге аралап жүріп ескерту жасау керек. Бұл іске кәсіпкерлік бөлімі де жұмылдырылсын. Қала тазалығына әрбір тұрғын жауапты, — деді Айбек Мүталапханұлы.
Бұдан кейін қала басшысы Шығыс кентінің Олимпийская көшесіндегі бірқатар тұрғын үйлерді аралап көрді. Аталмыш аудан тұрғындарын жылдар бойы көктем келісімен көтерілетін жер асты суы алаңдатады. Ауданда жер асты суы бұрыннан бар. Алайда тұрғындар оның 2000-шы жылдары деңгейі көтеріліп кеткенін айтады.
— Үйді 1997 жылы сатып алған едік. Бұл жертөледе кортоп, сәбіз сынды кез келген көкөністі сақтай алатынбыз. Жылдар өте одан да қалдық. Су деңгейі жыл сайын көтеріліп келеді, — дейді Нина Ивченко.
Су деңгейінің көтерілуіне бірнеше себеп бар. Оның үстіне аумаққа тұрғын үйлер салуға кезінде заңсыз рұқсат берген. Жер асты суының көтерілуіне тұрғындардың да өз тараптарынан кемшіліктер бар. Арнайы рұқсатсыз тастаған күл – қоқыстар су жолдарын бөгеп, міне, енді келеңсіздіктер орын алуда.
Тұрғындардың өтінішін тыңдаған қала әкімі жағдайдан шығудың жүйелі жолын қарастыру керекті-гіне тоқталып, қалалық ТҮКШ бөлімінің басшысы Ерған Қанафьевке ауданның картасы мен су арналарының картасын жасап шығаруды тапсырып, бұл өз кезегінде мәселені кешенді түрде шешуге мүмкіндік беретінін атап өтті.
Тұрғындар соңғы жылдары Шығыс кентінің көшелері жөнге келе бастағанын, ауданда бірқатар көшелер жөндеуден өткенін айта келе, өз көшелерін де жөнге келтіруді өтінді. Қала әкімі барлығы біртіндеп шешіліп келе жатқанын, биыл аталмыш аудандағы негізгі көшелердің бірі Аюченко көшесі жөндеуден өтетінін атап өтті.
Сондай –ақ Айбек Кәрімов қаладағы негізгі көшелердің бірі Қабанбай батыр көшесінде болып, жүргізіліп жатқан жөндеу жұмыстарымен танысты. Аталмыш көшені мамыр айының басына дейін жөндеп бітіруді тапсырды.
Асан МЫРЗАХАНОВ,
«Семей таңы»
