Өткен аптада Семей қаласында тағы бір жекеменшік балабақша ел игілігіне берілді. «Бәйшешек» балабақшасының ашылу салтанатына қала әкімі Айбек Кәрімов бастаған жергілікті билік өкілдері қатысты.
{jcomments on}«Бәйшешек» жекеменшік балабақшасының лентасын қала басшысы Айбек Мүталапханұлы мен ардагер ұстаз Ғайни Серғазықызы қиды. Салтанатты рәсімнен соң қазақы дәстүр бойынша ақжаулықты әжелер шашу шашты. Айбек Мүталапханұлы бастаған жергілікті билік өкілдері жұмысын енді бастап отырған «Бәйшешек» балабақшасын аралап, танысты. Мәртебелі меймандар балғындардың ертеңгілігін тамашалады. Шара барысында сөз алған Айбек Кәрімов:
— Балабақшаның ашылуы ата-аналар үшін өте үлкен қуаныш екені даусыз. Мұнда балалар қоғамдық тәрбие алады. Жалпы, қалаға балабақшалар мен мектептер сияқты әлеуметтік маңызы бар нысандар көбірек керек. Бұл тұрғыда мемлекет тарапынан қолдау зор. Биыл қаламызда тағы да осындай балабақша ашылатын болады. Жаңадан жұмысын бастап отырған балабақша ұжымына сәттілік тілеймін. Бүлдіршіндеріміз Қазақстанның үлкен азаматтары болып өсіп, ата-аналарын тек қана қуанта берсін, — деп, жылы лебізін білдірді.
Ал өз кезегінде балабақша тәрбиеленушілерінің ата-аналары атынан сөз алған Индира Тоқтасынова:
— Біздің қуанышымызда шек жоқ. Осындай балабақшаның ашылып отырғанына өте ризамыз. Мұнда балалар үшін барлық жағдай жасалған. Осындай балабақшалар шаһарымызда көбейе берсін, — деген жүрекжарды лебізін білдірді.
Семей қалалық білім бөлімінің басшысы Наталья Фесенконың айтуынша, «Бәйшешек» қаладағы 34-ші балабақша, оның 16-сы мемлекеттік болса, қалған 17-сі жекеменшік екен. Наталья Фесенко алдағы уақытта мұндай балабақшалар шаһарда әлі де ашылатынын айтып өтті. Әлбетте, балабақшалардың көптеп ашылуы — қала демографиясының өскенінің белгісі.
— «Бәйшешек» — аралас тілдегі балабақша. Жалпы, 125 орындық мектепке дейінгі тәрбие ордасында 5 топ бар. Оның әрқайсысында 25 баладан болса, оның бірі — орыс тобы. Әр топ үшін жуынатын бөлмелер қарастырылған. Өнер залы да бар, — дейді балабақша директоры Наталья Уйсумбаева.
Нұрдәулет КӘКІШЕВ,
«Семей таңы»
