Semeytany.kz – Абай облысының әкімі Берік Уәли Халықаралық әйелдер күніне орай өңірдегі аналар мен аруларға арнап құттықтау жолдады.
Аймақ басшысы өз құттықтауында 8 наурыздың әйел затына құрмет көрсететін ерекше күн екенін атап өтті. Ол әйелдің қоғамдағы орны қашанда биік екенін айтып, ананың мейірімі, арудың ақылы, қарындастың ізеті мен жардың адалдығы елдің берекесі мен тұтастығының негізі екенін жеткізді.
Сондай-ақ құттықтауда Мемлекет басшысы Қасым-Жомарт Тоқаевтың ана мен баланың жағдайы дұрыс болса, қоғамның да ахуалы жақсаратыны туралы пікірі келтірілді. Бұл ретте мемлекет тарапынан әйелдерді қорғау мен қолдауға ерекше мән беріліп отырғаны айтылды.
Берік Уәли өңірдегі нәзік жандардың қоғам өміріндегі белсенді рөліне де тоқталды. Оның айтуынша, бүгінде Абай облысында 300 мыңнан астам әйел тұрады. Олардың басым бөлігі білім беру, денсаулық сақтау, әлеуметтік қамту және мәдениет салаларында еңбек етіп жүр.
Облыс әкімі әйелдерді отбасының ғана емес, тұтас қоғамның алтын қазығы деп атап, өңірдің дамуына қосып жүрген үлестері үшін шынайы алғысын білдірді. Құттықтау соңында аймақ басшысы барша аналар мен аруларға мықты денсаулық, бақ-береке және амандық тіледі.
