Ағымдағы жылдың 3 ақпанынан бастап Астана қаласында Қазақстан Республикасы Ұлттық ұланының ұйымдастыруымен «Біз Жеңістің ізбасарларымыз» атты әскери—патриоттық эстафета жүргізілуде. Жеңістің 70 жылдығы қарсаңында 1941 жылдың 15 желтоқсанында құрылған 72-ші гвардиялық атқыштар дивизиясының жауынгерлік туының көшірмесі еліміздің әр өңіріне жеткізіліп, салтанатты түрде табыс етілуде. Аталмыш тудың көшірмесін табыс етудің салтанатты рәсімі Семей қаласында да өтті.
{jcomments on}Орталық алаңда өткен салтанатты шараға қалалық ішкі саясат бөлімінің басшысы Айдар Садырбаев, соғыс ардагері Петр Коломин, Ауған соғысы ардагерлері кеңесінің төрағасы Боранбай Бегатов және «Шығыс» өңірлік әскери қолбасшылығының сардарлары мен сарбаздары, Ш.Уәлиханов атындағы «Жас ұлан» ерлер лицейінің оқушылары қатысты. Шара барысында алғашқы болып сөз алған соғыс ардагері Петр Коломин:
— Ту символын сақтау – ерліктің, намыстың, батырлықтың белгісі. Сондықтан оны сақтай отырып, көкте желбіретіп, тек қана алға қадам басу керек. Біз де соғыс кезінде осындай туымызды биікте ұстап, рухымызды оятып, басымызды қатерге тіктік. Міне, соның арқасында Жеңіске жеткен болатынбыз. Небір шайқасты аралап өткен тудың көшірмесі біздің қаламызға да келіп жеткен екен. Мұндай маңызды шараның өтуі ерлікке деген тағзымның белгісіндей, — деді өз сөзінде.
Өз кезегінде сөз алған Боранбай Бегатов та аталмыш шараның өткізілуімен және Жеңістің 70 жылдығымен барша жиналғандарды Ауған соғысы ардагерлерінің атынан құттықтап, ізгі тілегін білдірді.
Айта кету керек, 72-ші гвардиялық атқыштар дивизиясының жауынгерлері Сталинградтан Прагаға дейінгі жерде өмірлерін қатерге тігіп, ерлік көрсетіп, өздерінің туын желбіретіп жүріп өткен. Ресми ақпараттарға сүйенсек, 72-ші гвардиялық атқыштар дивизиясының 18 мыңнан астам сарбаздары мен сардарлары түрлі орден — медальдармен марапатталған. Ал олардың 30-дан астамы Кеңес Одағының Батыры атанған. Сұрапыл соғыс уақытында жауынгерлерді ерлікке бастаған тудың көшірмесін «Шығыс» өңірлік қолбасшылығына қарасты 5511 әскери бөлімінің командирі подполковник Қанат Есенболатов 6699 әскери бөлімінің командирі майор Бауыржан Барышевтан салтанатты түрде қабылдап алды. Аталмыш тудың көшірмесін желбіреткен сардарлар мен сарбаздар әскери оркестрдің сүйемелдеуімен сап түзеп, Орталық алаңды жүріп өтті.
Әскерилердің мәліметінше, 2015 жылдың 10 қаңтарында қол қойылған «Қазақстан Республикасының Ұлттық ұланы» туралы Заңында: “72-ші гвардиялық атқыштар дивизиясының жауынгерлік туының көшірме нұсқасы елордадағы ҚР Ұлттық ұланының жедел бригадасының мұражайында мәңгілік сақталсын” деп көрсетілген екен. Енді еліміздің ірі қалалары мен аудандарында болған соң аталмыш тудың көшірмесі 9 мамыр күні Астана қаласында Жеңістің 70 жылдығына арналған салтанатты шеруде желбірейтін болады.
Нұрдәулет КӘКІШЕВ,
«Семей таңы»
