Semeytany.kz — Абай облысында көктемгі су тасқынының алдын алу және қауіпті кезеңге дайындық барысы арнайы жиында талқыланды. Облыс әкімі Берік Уәлидің төрағалығымен өткен басқосуға жауапты басқарма басшылары, департамент жетекшілері, сондай-ақ «Қазгидромет», «ҚазАвтоЖол», «Қазсушар», «ҚТЖ» және өзге де мекемелердің өкілдері қатысты. Аудан және қала әкімдері жиынға бейнебайланыс арқылы қосылды.
Күн тәртібіндегі мәселелер бойынша сала мамандары өңірдегі қазіргі ахуал мен дайындық деңгейі жөнінде баяндама жасады. «Қазгидромет» РМК Абай облыстық филиалының директоры Ляззат Болатқанның айтуынша, облыстағы өзен-көлдердегі жағдай тұрақты. Барлық бақылау бекеттерінде су деңгейі қауіпті межеден төмен, ал Шүлбі су қоймасына келетін су көлемі қалыпты деңгейде болжанып отыр. Мамандар ауа райы мен су айдындарындағы жағдайды үздіксіз бақылап, ықтимал қауіп туралы ескертулерді тиісті органдарға уақытылы жолдап келеді.
Төтенше жағдайлар департаменті өкілдері су тасқыны кезеңіне арналған күштер мен құралдардың жоғары дайындыққа келтірілгенін мәлімдеді. Қазір облыста 1436 адам мен 543 техникадан құралған арнайы топ жасақталған. Бұдан бөлек, 30 жүзу құралы және 171 су айдау құрылғысы әзір тұр. Қажет болған жағдайда Қорғаныс министрлігінің техникасы мен тікұшақтарын тарту мүмкіндігі де қарастырылған. Соңғы күндері жауын-шашын мен қардың еруі салдарынан Семей қаласының кейбір көшелерінде су жиналып, құтқарушылар 9 мың текше метрден астам суды сыртқа шығарған.
Жиында аймақ басшысы қала және аудан әкімдеріне нақты тапсырмалар берді. Атап айтқанда, қарды дер кезінде шығару, су арналары мен арықтарды тазарту, еріген қар суының кедергісіз ағуын қамтамасыз ету, қорғаныс бөгеттерін тексеріп, нығайту, сондай-ақ қауіпті аймақтарда күштер мен техниканы толық дайын ұстау міндеттелді.
Берік Уәли көктемгі кезеңде басты мақсат – су тасқыны қаупінің алдын алып, халықтың қауіпсіздігін қамтамасыз ету екенін атап өтті. Оның сөзінше, су қоймаларындағы жағдай тұрақты бақылауда болуы тиіс, ал қажет жағдайда артық суды кезең-кезеңімен қауіпсіз жіберу шаралары жалғасуы керек. Сонымен қатар қауіпті аумақтарда тәулік бойы кезекшілік ұйымдастыру және материалдық-техникалық қорды жеткілікті көлемде дайындау міндеті жүктелді.
