Семей қаласында мектеп оқушылары арасында республикалық дебат турнирінің облыстық кезеңі бастау алды. Зияткерлік сайыстың ашылуы Наурызнама онкүндігінің алғашқы мерекесі – Амал күнімен тұспа-тұс келіп, ерекше мәнге ие болды.
Турнирдің салтанатты ашылу рәсімі Семей қаласындағы №52 мектепте өтті. Шара барысында қатысушыларға Көрісу күнінің мән-маңызы түсіндірілді. Бұл күн – ұзақ әрі қатал қыстан кейін ағайын-туыс, жақын-жуық, дос-жаран бір-бірімен қауышып, амандық сұрасатын ерекше дәстүрлі мереке. Қазақ халқы бұл дәстүрді ерте заманнан бері сақтап келеді. Ол қыстың аяқталып, көктемнің келуін білдіреді.
Облыстық ғылыми-әдістемелік «Дарын» орталығы басшысының орынбасары Лаура Карипбаева турнирге 23 команда қатысатынын атап өтті.
– Ата-аналарды, ұстаздарды және, әрине, турнир қатысушыларын құттықтаймын. Бүгін республикалық дебат турнирінің облыстық кезеңі басталып отыр. Бұл сайысқа 23 команда қатысады. Сонымен қатар бүгін финалдық кезең де өтеді. Әрбір қатысушы үшін облыс намысын абыроймен қорғап, республикалық кезеңде жоғары нәтиже көрсету маңызды. Турнир мемлекеттік, орыс және ағылшын тілдерінде өтетін үш лига бойынша ұйымдастырылады, – деді Лаура Карипбаева.
Қатысушылардың айтуынша, аздап толқу болғанымен, олар тартысты әрі әділ додаға толық дайын.
– Біз бұл турнирге ұзақ уақыт бойы тыңғылықты дайындалдық. Мақсатымыз – облыстық кезеңде жеңіске жетіп қана қоймай, республикалық кезеңде де бар мүмкіндігімізді көрсету. Жүйелі дайындықтың арқасында жоғары нәтижеге қол жеткіземіз деп сенеміз, – деді турнир қатысушыларының бірі.
