Жуырда қалалық Достық үйінде «Айша бибі» ұлттық салт—дәстүр орталығы әжелерінің ұйымдастыруымен «Ақ бауырсақ» мерекесі болып өтті. Ас атасы саналар дастарқан төрінің сәні, қазақы тағамның бірегейі бауырсақ арқылы көптеген ізгі ұғымдарды өрбітуге болады. Оған аталмыш байқау барысында айқын көз жеткіздік.
{jcomments on}Қазақ халқының ешбір тойы бауырсақсыз өтпейді. Ал мерекелік дастарқанның басты мәзірін әзірлеудің өзіндік қырлары бар. Оны әсіресе көненің көзі – әжелер қауымы жақсы біледі. Аталмыш шараны ұйымдастырудағы басты мақсат та сол – кейінгі өскелең буынға ұлттық үрдісті насихаттау. Сол себепті де Қазақстан халқы Ассамблеясы жылы аясында және келе жатқан алдағы 1 Мамыр — Қазақстан халқының бірлігі күніне орай, есте қаларлықтай ерекше сайыс өткізу көзделген болатын.
Бұл ретте қазылар алқасы құрамына орыс, неміс, өзбек орталықтарының мүшелері, этнографтар мен өнертанушылар шақырылды. Ал жалпы көрермен шаһарымыздағы студент жастар, ардагерлер ұйымының мүшелері болды.
Байқау барысында ақ кимешекті әжелер жиналған қауым алдында бауырсақты қалай әзірлеу керектігін ғана емес, оған қосылатын ингредиенттер мен пісірілу ретін, түрлері мен атауларын да атап, өз «туындысын» қорғап шығуы тиіс болатын. Сондай-ақ аталмыш шарада келуші көпшілікке қазаннан жаңа түскен ыстық бауырсақ үлестіріліп, наурыз көже ұсынылды.
— Біз бүгінгі шараға 20-дан аса өнім түрін әкеліп қойдық. Бұл тағам бізге бабаларымыздан мұра болып келе жатыр. Кейінгі ұрпақ оны бағалап қана қоймай, талапқа сай даярлауды да меңгере берсін деген тілектеміз. Байқауды Наурыз мерекесінің жалғасы, 1 Мамыр мерекесін тойлаудың бастамасы ретінде өткізіп отырмыз, — дейді «Айша бибі» ансамблінің музыкалық жетекшісі Хафиза Омарова.
Байқау барысында бауырсақ түрлерінен арнайы көрме әзірленген болатын. Мұнда келушілер қазақы дәмнің сан алуан түрлерімен танысып, дәмін тату мүмкіндігіне ие болды. Атап айтсақ, ши бауырсақ, саусақ бауырсақ, үлкен бауырсақ, қытырлақ сынды көлемі мен әзірленуіне қарай бірнеше атауға ие өнімдермен әжелер өздері таныстырды. Сонымен қатар нан тағамын тіл үйірерліктей етудің өзіндік құпияларымен де бөлісті. Мысалы, қамырға май емес, майонез қосып, я болмаса ұнды тек жұмыртқаға ғана илеп, немесе сірке суын тамызу арқылы ерекше бауырсақ пісіретін заманауи әжелер де бар болып шықты.
Байқау барысында қатысушы көрермендер де әжелерге сұрақтар қойып, қазақтың дастарқан мәдениеті жайлы тұшымды жауап ала алды.
Осылайша, тартымды өрбіген шараның соңында әділ қазылар алқасының шешімімен ең үздік бауырсақ анықталып, иесі марапатталды. Атап айтсақ, ансамбль мүшесі Мәклима Қараханованың үйінен даярлап әкелген бауырсағы дәмі мен пісірілу технологиясы жағынан айрықша деп танылып, бас жүлдені еншіледі. Сонымен қатар байқауда белсенділік танытқан өзге әжелерге де жүлделі орындар берілді.
Қуаныш ЖОЛЫМБЕТ,
«Семей таңы»
