Semeytany.kz — Абай облысында Наурыз мейрамына арналған онкүндік аясында «Семейдің мәдени маусымдары» жобасы бастау алды. Амал күніне орай Семей қаласының Қарағайлы ықшам ауданындағы Республика алаңында «Семей көктемі» фестивалі өтіп, тұрғындарға ұлттық дәстүр мен өнерді ұлықтаған мерекелік бағдарлама ұсынылды.
Фестиваль аумағында арнайы сахна орнатылып, киіз үйлер тігілді. Шара театрландырылған көрініспен ашылып, көрісу дәстүрі мен аластау рәсімі сахналанды. Мерекелік жиынға облыс әкімі Берік Уәли қатысып, жұртшылықты Ұлыстың ұлы күнімен құттықтады.
Аймақ басшысы өз сөзінде Наурыз мейрамы енді жаңартылған форматта, «Наурызнама» тұжырымдамасы аясында кең көлемде аталып өтіп жатқанын айтты. Оның айтуынша, бұл бастама мейрамның мазмұнын тереңдетіп, оны бір күндік думаннан ұлттық жаңғыру кезеңіне айналдыруды көздейді.
Берік Уәли осы күні өңірдің мәдени өміріне тың серпін беретін «Семейдің мәдени маусымдары» атты жаңа жобаны ресми түрде жариялады. Жоба аясында мәдени іс-шаралар енді жылдың төрт мезгіліне сай ұйымдастырылып, «Семей көктемі», «Семей жазы», «Семей күзі» және «Семей қысы» форматында өтеді. Облыс әкімі бұл бастаманың Абайдың төрт мезгілді жырға қосқан классикалық туындыларымен сабақтас екенін ерекше атап өтті.
Шара өткен Республика алаңы былтыр Республика күні қарсаңында ел игілігіне берілген. Биыл мереке барысында алаң төрінде мемлекеттік ту көтеріліп, көк байрақтың бұл жерде тұрақты желбіреп тұратыны айтылды.
Облыс әкімі қаладағы абаттандыру жұмыстары биыл бірнеше есеге ұлғаятынын да жеткізді. Оның айтуынша, Семейде 100 аула абаттандырылып, тағы 100 аулаға асфальт төселеді. Сонымен қатар, 100 көшеге орташа жөндеу жүргізіліп, сонша көше жарықтандырылады. Былтыр қалада 35 аула абаттандырылып, 40 аулаға асфальт төселген, 52 көшеге жөндеу жасалып, 15 көше жарықтандырылған.
Мерекелік концертте өңір өнерпаздары мен шығармашылық ұжымдар өнер көрсетті. Жалпы, «Наурызнама» онкүндігі аясында Абай облысы бойынша 300-ден астам мәдени, әлеуметтік және спорттық іс-шара өткізу жоспарланып отыр.
