Semeytany.kz – Абай облысының әкімі Берік Уәли жұмыс сапарымен Аягөз ауданына барып, аудан орталығындағы бірқатар білім беру нысандарының жай-күйімен танысты.
Аймақ басшысы алдымен былтыр жеке инвесторлардың қаржысына салынған «Асыл Ана» балабақшасына барды. 100 орынға арналған мектепке дейінгі мекеме төрт топтан құралған. Екі қабатты ғимараттың жалпы аумағы 652,2 шаршы метрді құрайды.
Балабақшада балаларды тәрбиелеу мен оқыту заманауи талаптарға сай ұйымдастырылған. Қазір мұнда 20 қызметкер еңбек етеді. Тәрбиеленушілердің шығармашылық және дене қабілетін дамыту үшін хореография және каратэ үйірмелері жұмыс істейді. Сондай-ақ балалар күніне бес мезгіл тамақпен қамтылып, қажетті материалдық база толық қарастырылған.
Облыс әкімі балабақшаны аралап, тәрбиешілермен пікір алмасты. Ол мектепке дейінгі білім беру ұйымдарының заман талабына сай болуы аса маңызды екенін атап өтті.
Сапар барысында Берік Уәли Кешірім Бозтаев атындағы қазақ мектеп-гимназиясының жұмысымен де танысты. 1938 жылы ашылған білім ордасының жобалық қуаты 398 оқушыға арналған. Алайда бүгінде екі қабатты мектепте 663 оқушы білім алып жатыр. Мұнда 68 мұғалім еңбек етеді. Оқушылар математикалық-жаратылыстану және қоғамдық-гуманитарлық бағыттар бойынша білім алса, гимназия сыныптарында қоғамдық-гуманитарлық бағыт тереңдетіліп оқытылады.
Өткен жылы мектеп ғимаратына күрделі жөндеу жүргізіліп, материалдық-техникалық базасы жаңартылған. Соның аясында жаңа кабинеттер қажетті жабдықтармен қамтамасыз етіліп, биология, химия, физика, информатика және STEM кабинеттері заманауи құралдармен қайта жабдықталған.
Мектеп директоры облыс әкіміне білім ордасының жанынан қосымша ғимарат салу қажеттігін жеткізді. Оның айтуынша, қазіргі таңда оқушы орны тапшы. Аймақ басшысы оқу кабинеттерін, кітапхана мен музейді аралап көріп, педагогтермен жүздесті.
Берік Уәли ауылдық жерлердегі мектептердің материалдық-техникалық базасын нығайту мен білім сапасын арттыру бағытындағы жұмыстар жалғаса беретінін айтты.
«Күрделі жөндеу жұмыстары сапалы жүргізілген. Жаңа кабинеттер мен заманауи жабдықтар оқушылардың сапалы білім алуына мүмкіндік береді. Қосымша ғимарат салу мәселесін қарастыратын боламыз», – деді облыс әкімі.
Өңірде білім беру саласын жаңғырту жұмыстары жалғасып келеді. Былтыр облыстағы 12 мектепке күрделі жөндеу жүргізуге 2,9 млрд теңге бөлінген. Соның ішінде 9 мектеп толық реновациядан өтіп, заманауи жабдықтармен қамтылған. Бұдан бөлек, облыстың 75 мектебіне 131 оқу кабинеті сатып алынған. Оның 89-ы – жаңа модификациядағы кабинеттер. Сонымен қатар, «Қазақстан халқына» қорының қолдауымен 36 мектеп 58 кабинетпен, ал 4 балалар шығармашылық орталығы 500 млн теңгеге техникалық-ғылыми және STEM бағытындағы жаңа кабинеттермен жабдықталған.
