Semeytany.kz — Абай облысының әкімі Берік Уәли Аягөз қаласындағы «Қамқор Локомотив» ЖШС филиалы – Аягөз локомотив жөндеу депосында болып, кәсіпорынның қазіргі жұмысы мен алдағы жоспарына қанықты.
Аймақ басшысына нысанның өндірістік әлеуеті, негізгі қызмет бағыттары және даму мүмкіндіктері таныстырылды. 1930 жылы құрылған депо бүгінде «ҚТЖ – Жүк тасымалы» компаниясына қарасты ТЭ33А, ТЭ33АС және ТЭП33А сериялы тепловоздарға сервистік қызмет көрсетіп келеді.
Кәсіпорында қазір 130 адам еңбек етеді. Жылдық жоспарға сәйкес мұнда 435 бірлік тепловозға қызмет көрсету көзделген. Депо өндірістік цехтармен, электромашиналық және тепловоз экипаж бөлігіне қызмет көрсету бөлімшелерімен, қазандықпен, автокөлік бокстарымен және қоймалармен жабдықталған. Сонымен бірге теміржол жылжымалы құрамы мен арнайы техникасы да бар.
Аягөз локомотив жөндеу депосы тек Абай облысына ғана емес, Алматы, Қызылорда, Ақмола, Ақтөбе және Атырау облыстарындағы теміржол саласына да сервистік қызмет көрсетіп отыр.
Өндірістік нысанды аралап шыққан облыс әкімі теміржол бағытындағы мұндай кәсіпорындардың өңір экономикасы үшін айрықша маңызға ие екенін атап өтті.
