Қала әкімі А. Кәрімов кезекті аппараттық кеңесті үстіміздегі екі айлық сенбіліктің жүзеге асу барысы мен берілген тапсырмалардың орындалуына назар аударудан бастады. Қаланың тазалығы коммуналдық мекемелердің ғана құзырында емес, қала тұрғындарының да еншісіндегі жауапкершілік екеніне тоқталды.
{jcomments on}Көктемгі маусымда бірнеше мәрте сенбілік ұйымдастыру — қоршаған ортаны таза сақтауға, қаланың ажарын арттыруға бірден-бір үлкен әсер ететін шара. Бірақ осы жалпыхалықтық мәселеге кім қалай атсалысып отыр? Қала басшысы осы бағытта біраз мысалдар келтіріп, кейбір мекемелердің төңірегі әлі тазартылмай жатқанын қадап айтты. Әсіресе шағын және орта кәсіпкерлік өкілдерінің қала тазалығынан бұрын, өз жұмыс орындарының айналасын ретке келтіруге құлықсыз екендігіне нақты мысалдар келтірді. Бұлтартпас дәлелдерді көлденең тарта отырып, қалалық кәсіпкерлік, жер қатынастары бөлімдерінің басшыларына заңды тұлғаларды қала тазалығы алдында белсенді болуға шақыру керектігін міндеттеді.
Расында, қала аумағында қаншама базарлар, дүкендер, дәмханалар, дәріханалар, банк бөлімшелері, ПИК (КСК), шаштараздар, ТҚС (СТО), сырахана сияқты сауда орындары мен қызмет көрсету мекемелері жетіп артылады. Мәселе — соңғы екі сенбілікте осы мыңдаған кәсіпкерлік нысандардың қаншасы өз айналасында тазалық жұмысын ұйымдастырды екен?! Ұйымдастырғанынан ұйымдастырмағаны әлдеқайда басым болғандығы қалалықтардың көз алдында. Неге олар құлықсыз деген заңды сұрақ туындайды. Көбінесе құлықсыздық адамдардың ортақ мәселеде өзін жауапты сезінбеуінен туындап жататындығы- өмір шындығы. Одан шығатын қортынды: кәсіпкерлікпен шұғылданған көптеген заңды тұлғаларымыз жеке табысқа басымдық беріп, ортақ шаруаны елемей жатады. Ол жақсы көрініс емес. Кез келген кәсіпкер табыс тауып отырған жерінің төңірегін таза ұстап, абаттандыру арқылы қаланың тазалығына үлес қосумен бірге, өзінің тұтынушыларына құрмет көрсететінін ескере бермейді. Ескерген жағдайда, қызмет көрсету орындарының маңайы әрдайым мұнтаздай таза болып тұратын еді. Сондықтан кез келген ғимарат айналасында сенбілік кезінде ғана емес, жылдың төрт мезгілінде де қалыпты тазалықтың сақталуы сол нысанға жауапты адамдардың ішкі жауапкершілігіне байланысты.
Ал соңғы екі сенбілікте жүзеге асқан жұмыстардың бірқатарына тоқтала кетсек, аз шаруа атқарылған жоқ. Бірінші күннен бастап бюджеттік мекемелер, оқу орындары, ірі кәсіпорындар белсене атсалысып, қала көшелері қар астынан шыққан қоқыстардан барынша арылды. Бұл тұрғыда ТҮКШ бөлімі басшысының міндетін атқарушы Ерған Қанафьев соңғы сенбілікке жиыны 54 техника жұмылдырылғанын мәлімдеді. Оның 39-ы автосамосвал көлігі болса, 15-і- жүктиегіш. Бағынышты мекемелер өздеріне бекітілген аумақтар мен көшелерді ретке келтіріп, коммуналдық қызмет күшімен бірінші сенбілікте 814 текше метр қоқыс тасылса, екінші сенбілікте 630 текше метр қоқыс шығарылыпты.
Аппараттық кеңесті қортындылаған қала басшысы сенбілікті одан әрі жалғастыру мәселелері мен көше жолдарына жөндеу жұмыстарын кешіктірмей бастау керектігін тапсырды. Бірінші кезекте Қабанбай көшесі мен ескі көпірдің жолдарын ағымдағы жөндеуден өткізіп алу керектігін міндеттеді. Сонымен бірге қаланы абаттандыру жұмысын жеделдету, инфрақұрылымдарды жаңарту мен терможаңғырту мәселелеріндегі кезекті шаруаларды тоқтатпауды қадап айтты.
Семей қаласы әкімінің баспасөз қызметі.
