Семей қаласының ежелден жеңіл өнеркәсіптің орталығы болғаны белгілі. Алдағы уақытта да бұл сала қайтадан жандана түспек. Кеше қала әкімі Айбек Кәрімовтің қатысуымен «AGRO PORTAL» ЖШС Қазақстан — Иран компаниясының инвестициялық қаржысына салынатын ет өңдеу комбинатының құрылыс жұмыстарының ашылу салтанаты болды.
{jcomments on}Би Боранбай, 96 мекенжайында орналасқан «Өндіріс» кәсіпкерлікті дамыту индустриялық аумағының маңынан қала әкімінің қолдауымен ет өңдеу комбинатының құрылыс жұмыстарына арнайы жер бөлінген. Аталмыш ет комбинатының өндірістік қуаттылығы «Халал» технологиясы бойынша тәулігіне 400 бас ірі қара малдың еті мен 2000 бас ұсақ малдың етін өндіруге, жалпы, жылына 7 мың тонна ет консервісі мен 7 мың тонна шұжық өнімдерін өндіруге қауқарлы болмақ. Ет өңдеу комбинатында 250 жаңа жұмыс орны ашылса, онда, негізінен, жергілікті халық жұмылдырылады деп күтілуде.
Салтанатты шараға қала маңындағы ауылдық округтердің әкімдері мен шаруа қожалықтардың басшылары қатысты. Шара барысында қала әкімі Айбек Кәрімов алғашқы болып сөз алды.
— Ет өңдеу комбинаты жұмысын бастаған соң, етті өткізетін тұрақты орын болады. Қаладағы ет өңдеу комбинаттарының арасында бәсекелестік те орнайды. Тұрақты ет өткізетін орын болса, малдың басы да көбейеді. Бұл тұрғыда әсіресе ауыл шаруашылығы саласының дамуына серпін береді. Сонымен қатар ет өңдеу комбинаты жұмысын бастаған соң, қаладағы былғары-мех комбинатының да жұмысы қарқынды жүргізіле түседі. Қаламызда тағы бір ірі өндіріс орны пайда болса, шаһардың әлеуметтік-экономикалық дамуына да үлкен әсер етеді. Сондай-ақ ирандық инвесторлар ет комбинатының маңынан тұрғын үйлердің де құрылыс жұмыстарын жүргізетін болады. Жерді құнарландырумен айналысып, өсімдік өсіруді де қолға алмақ, — деген Айбек Мүталапханұлы сөз соңында шетелдік инвесторлардың жұмысына сәттілік тіледі.
Өз кезегінде «AGRO PORTAL» ЖШС-нің бас директоры Шакарчи Амир Хоссейн Ядоллах:
— Жақында екі ел президенттері Астанада Қазақстан мен Иран мемлекеттері арасындағы бірқатар келісімшарттарға қол қойған болатын. Екі ел арасындағы әріптестік байланыстың дамуына, шетелдік инвесторларға зор мүмкіндік жасағаны үшін, ең алдымен, Мемлекет басшысына алғысымыз шексіз. Сонымен қатар біздің инвестициялық жобамызға қолдау көрсеткені үшін, ШҚО әкімі Даниал Ахметовке, Семей қаласының әкімі Айбек Кәрімовке үлкен рақмет айтамыз. Жалпы, қазақ халқының қонақжайлығына тәнтіміз. Алдағы уақытта да екі ел арасындағы әріптестік байланыс нығая түседі деген сенімдеміз, — деді.
Ал құрылыс компаниясының президенті Хассани Назарободи Дабок та екі ел арасындағы байланыстың нығайып, үлкен істердің басталып жатқанына өзінің ризашылығын білдірді.
Ет өңдеу комбинаты құрылыс жұмыстарының ашылуы барысында арнайы лентаны Айбек Мүталапханұлы мен Шакарчи Амир Хоссейн Ядоллах салтанатты түрде қиғаннан кейін, ет комбинатының таныстырылымы болды. Одан кейін қала басшысы мен ирандық инвесторлар жаңа ет комбинатының құрылыс жұмыстарының басталған сәтін тамашалады.
Айта кету керек, ет өңдеу комбинатында ешқандай қалдықсыз өндіру қолға алынады. төрт түліктің тұяғы сияқты және басқа да қалдықтардың барлығы пайдаға жаратылмақ. Ет консервілері мен шұжық өнімдерімен қатар, үй жануарларының қорегі де өндірілмек. Жалпы, 4550,0 млн. теңге тұратын жоба 2015-2017 жылдары іске асырылатын болады.
Нұрдәулет КӘКІШЕВ,
«Семей таңы»
