Қазақстан Республикасы Премьер-министрінің орынбасары – Мәдениет және ақпарат министрі Аида Балаева елдегі жаңа Конституцияны қабылдауға арналған жалпыхалықтық референдумға қатысты.
Министр дауыс беру рәсімін Астана қаласындағы Қазақстан Республикасының Ұлттық академиялық кітапханасында орналасқан №129 сайлау учаскесінде өткізді.
Бүгінгі саяси науқанның маңызына тоқталған Аида Балаева жаңа Конституцияны қабылдау ел дамуының келесі кезеңіне бастайтын маңызды қадам екенін айтты.
«Әр ұлт, әр мемлекет өзінің алдағы даму жолын айқындауға ұмтылады. Қазақстан да сол үрдістен тыс емес. Халықтық Конституцияны қабылдау – әділетті әрі озық Қазақстанды құруға негіз болады. Қазақстандықтар дұрыс таңдау жасайды деп сенемін», – деді Аида Балаева.
Сондай-ақ Мәдениет және ақпарат министрі референдум күні қазақстандықтардың азаматтық белсенділігі жоғары екенін атап өтті. Оның айтуынша, таңнан бері халықтың дауыс беруге белсенді қатысуы елде ашық қоғамның қалыптасқанын, саяси мәдениеттің өскенін және азаматтардың мемлекет болашағына бейжай қарамайтынын көрсетеді.
«Біз таңертеңнен бері ақпараттық кеңістікке мониторинг жүргізіп отырмыз. Қуантатыны – референдумға халықтың белсенді қатысып жатқаны анық байқалады. Бұл Қазақстанда ашық қоғам қалыптасқанын, саяси мәдениеттің жоғарылағанын және азаматтық жауапкершіліктің нақты сезілетінін аңғартады. Елімізге деген жанашырлық бар, жауапкершілік бар. Бұл – Мемлекет басшысының 2019 жылдан бері әділетті әрі прогрессивті Қазақстан құруға бағытталған саяси реформаларының нақты нәтижесі деп ойлаймын», – деді Премьер-министрдің орынбасары.
Айта кетейік, референдумға арналған дауыс беру учаскелері Астана уақытымен таңғы сағат 07:00-ден кешкі 20:00-ге дейін жұмыс істейді.
