Абай облысында есірткі құралдарының заңсыз айналымына қарсы күрес құқық қорғау органдары қызметінің басым бағыттарының бірі. Бұл бағытта толығырақ Абай облысы Полиция департаментінің Есірткі қылмысына қарсы іс-қимыл басқармасының аға жедел уәкілі, полиция капитаны Думан Үкіжанов баяндады.
— Есепті кезеңде облыс аумағында есірткіге қатысты 28 қылмыс және 29 теріс қылық анықталған. Заңсыз айналымнан жалпы салмағы 51 келіні құрайтын түрлі есірткі және психотроптық заттар тәркіленді. Сонымен қатар, жедел-іздестіру іс-шараларының нәтижесінде синтетикалық есірткілерді жеткізудің екі тұрақты арнасы жойылып, есірткі қылмысына қатысы бар 10 адам ұсталды. Оның ішінде синтетикалық заттарды сақтау фактісі бойынша 2 тұлға жауапкершілікке тартылды, — деп атап өтті спикер.
Қазіргі таңда синтетикалық есірткілердің таралуы өңір үшін өзекті мәселелердің бірі болып отыр. Заманауи технологиялардың дамуына байланысты есірткі трафигі интернет желісі арқылы байланыссыз тәсілмен жүзеге асырылып, құқық қорғау органдарының жұмысын күрделендіруде. Осыған байланысты Полиция департаменті есірткі қылмыстарын анықтау мен жолын кесуде ақпараттық жүйелер мен заманауи әдістерді белсенді түрде қолдануда.
— Профилактикалық жұмыстар да ерекше назарда. Жасөспірімдер арасында нашақорлықтың алдын алу мақсатында жалпы білім беру мекемелерінде 37 дәріс өткізіліп, есірткіге қарсы деректі фильмдер көрсетілді. Сонымен қатар, «Біз өмірді таңдаймыз, біз есірткіге қарсымыз» ұранымен кең ауқымды акциялар, флешмобтар және спорттық іс-шаралар ұйымдастырылуда, — деді Думан Үкіжанов.
Айта кету керек, Қазақстан Республикасы Үкіметінің 2025 жылғы 19 желтоқсандағы №1117 қаулысымен 2026–2028 жылдарға арналған нашақорлық пен есірткі бизнесіне қарсы күрес жөніндегі кешенді жоспар бекітілді. Құжат 7 бөлімнен, 106 тармақтан және 30 тармақшадан тұрып, ведомствоаралық өзара іс-қимылды күшейтуге, есірткіге тәуелділік деңгейін төмендетуге және жастарды қорғауға бағытталған.
Осы бағыттағы жүйелі жұмыстар алдағы уақытта да жалғасып, есірткісіз қоғам қалыптастыру жолында барлық қажетті шаралар қабылданатын болады.
