Semeytany.kz — Семей қаласындағы «Арена» спорт кешенінде 21-22 наурыз күндері дзюдодан ерлер мен әйелдер арасындағы «ABAI OPEN» республикалық турнирі өтіп жатыр.
Биылғы жарысқа еліміздің үш қаласы мен барлық облыстарынан 400-ге жуық спортшы жиналды. Турнирде балуандар 14 салмақ дәрежесі бойынша татамиде белдеседі.
Салтанатты ашылу рәсіміне Абай облысының әкімі Берік Уәли мен Қазақстан дзюдо федерациясының президенті Қуанышбек Есекеев қатысты. Аймақ басшысы жарысқа қатысушыларға сәттілік тілеп, дзюдоның жастарды тәртіпке, төзімділікке және жеңіске ұмтылуға баулитын маңызды спорт түрі екенін айтты.
Берік Уәлидің сөзінше, Мемлекет басшысы бұқаралық спортты дамыту ұлт саулығын сақтаудың басты шарттарының бірі ретінде атап өткен. Облыс әкімі «ABAI OPEN» турнирі татамиде шын мықтыны анықтайтын, шеберлік пен қайсарлық сыналатын маңызды дода екенін жеткізді. Сондай-ақ ол бұл жарыс тек мықтылардың бәсекесі ғана емес, өңірдегі жастарға серпін беретін алаң екенін атап өтті.
Абай облысында спорт инфрақұрылымын дамыту бағытында жүйелі жұмыстар жалғасып келеді. 2023 жылдан бері өңірде 16 спорт нысаны салынып, пайдалануға берілген. Қазір тағы 17 нысанның құрылысы жүріп жатыр.
Өңірде дзюдо спорты да қарқынды дамып келеді. Абай облысының спортшылары ел чемпионаттарында жоғары нәтиже көрсетіп, Азия және әлем біріншіліктерінде Қазақстан намысын қорғап жүр. Олардың қатарында Олимпиада ойындарының қатысушылары, Азия ойындары мен әлем чемпионаттарының жеңімпаздары және жүлдегерлері Ерлан Серікжанов, Еркебұлан Қосаев, Гүлжан Исанова бар.
Жыл басынан бері Семей қаласының Водный кентінде спорт кешені, ал Ақсуат ауданының Екпін ауылында спорт модулі ашылды. Бұдан бөлек, «Туған жерге туынды тік» инвестициялық форумы аясында Семей қаласы әкімдігі мен KAZ Minerals ЖШС арасындағы меморандум негізінде үлкен стадионның құрылысы жүргізіліп жатыр.
Жалпы, биылғы қаңтар-наурыз айлары аралығында өңір спортшылары Қазақстан чемпионаттарында 161 медаль жеңіп алған. Оның ішінде 40 алтын, 43 күміс және 78 қола медаль бар. Олимпиадалық спорт түрлері бойынша 27 алтын, 29 күміс және 59 қола жүлде еншілеген. Қазір облыстағы 26 спорт мекемесінде 14 мыңнан астам спортшы жаттығып жүр.
