Жуырда Семей қаласында әскери қоян-қолтық ұрыс өнерінен «NOMAD MMA» стилі бойынша республикалық 20-шы чемпионат болып өткен-ді. Бұл спорттық сайыста жерлесіміз зайсандық Айбек Аманбекұлы күміс медальді жеңіп алды.
{jcomments on}Каратэнің, кикбоксинг және күрестің самбо түрінің қосындысы саналатын бұл жекпе-жек елімізде 2005 жылдан бастап дамып келеді. Сондай-ақ 2013 жылдан бері ресми спорт түрі болып бекітілген.
Ал Айбек Аманбекұлы өзі ұнатқан бұл спорт түрімен 2012 жылдың күзінен бастап тұрақты түрде шұғылданып келеді. Осының алдында ол Дайдо Джуку Кудо сынды Шығыс жекпе-жегінен облыстың күміс жүлдегері атанған болатын. Ал 2013 жылы көктемде және күзде «NOMAD MMA» стилі бойынша облыстық сайыстың қола жүлдегері атанса, өткен жылы Қазақстан чемпионатының қола жүлдегері болды. Сонымен қатар жаттықтырушы деген куәлік алды.
Бүгінде Айбек Қаратал ауылдық Мәдениет үйіндегі күрес залында спортсүйер жастармен бірге үнемі жаттығу жүргізіп жүр. Талапты өренге жеңістер тілейміз.
Назира ҚАЛИЕВА,
«Семей таңы» газетінің штаттан тыс тілшісі.
