Жеңістің 70 жылдық мерекесін зайсандықтар да лайықты деңгейде қарсы алуда. От пен оқтың ортасынан оралған майдангерлер мен тылдағы ауыр еңбек арқылы еліміздің сол бір күнге жетуіне елеулі үлес қосқан жандар арамызда жетерлік. Ал оларға лайықты құрмет көрсету – перзенттік парызымыз.
{jcomments on}Жеңістің 70 жылдығына арналған мерекелік медальді кеуделеріне тағып, Қазақстан Республикасы Президенті Нұрсұлтан Назарбаевтың қолы қойылған куәлікті қолына алған майдангерлер мен тыл ардагерлерінің мерейі бір көтеріліп қалды.
Аудандық әкімдіктің мәжіліс залына жиналған қауым бұл күні ерекше көтеріңкі көңіл-күйде болды. Олардың барлығы да жалынды жастық шақтарын 1941-1945 жылдардағы соғыстың отты кезеңіне арнап, тылдағы тіршіліктің бел ортасында қайсарлық пен табандылықтың үлгісін көрсеткен аға ұрпақтың өкілдері.
Аудандық ішкі саясат бөлімінің ұйымдастыруымен өткізілген салтанатты жиынды аудан әкімі Алмас Оңдақанов алғы сөзбен ашты. Алмас Аманқолұлы өз сөзінде майдангерлерді, тыл ардагерлерін келе жатқан 9 Мамыр Жеңістің 70 жылдық мерекесімен құттықтап, көкірегі шежіреге толы қарияларға, ақ жаулықты әжелерге ақ тілегін арнады.
Салтанатты жиынға қатысқан аудандық мәслихат хатшысы Дәулет Ыдырышев, аудандық ардагерлер кеңесінің төрағасы Тұқан Мырзаханов, Зайсан қаласының әкімі Долдан Тожыбаев та өз лебіздерін білдірді.
Шара барысында республикалық, облыстық айтыстардың жүлдегері, ауданның бас ақыны Қазыбек Сейілқановтың қазақтың қара домбырасымен төгілдірген жыр шашуы тарих парағына қатталған уақыттың шынайы көрінісін көз алдыға әкеліп, қариялар көңілін тебірентті.
Осыдан соң аудан әкімі Алмас Аманқолұлы, аудандық мәслихат хатшысы Дәулет Нұрқанұлы, қала әкімі Долдан Ыбырайұлы залдағы тоқсаннан астам ардагердің қолын қысып, әрқайсысын Елбасының атынан құттықтап, кеуделеріне Жеңістің 70 жылдығына арналған мерекелік медаль тағып, Президенттің қолы қойылған куәлікпен бірге, ескерткіш сыйлықтарды да қоса тапсырды.
— Елбасының сындарлы саясаты мен көреген басшылығының арқасында көпұлтты Қазақстан мемлекеті бүгінде күллі әлемге танылып отыр. Аспанымыз ашық, іргеміз тыныш болсын, бейбіт заманның қаймағына қылау түспесін, басты тілегіміз — еліміздің, жеріміздің амандығы. Мен сияқты осы залда отырған аға ұрпақтың өмірі қасірет пен ауыртпалыққа толы болды. Жалынды жастығымызды Отанды қорғауға арнап, қолымызға қару ұстадық. Елбасына, облыс, аудан әкімдеріне мың мәрте алғыс. Құрмет көрсетіп, жағдайымызды жасап келеді. Аудандағы барлық майдангерлер қазір тұрмысқа қолайлы баспанамен қамтылған. Бүгін мемлекеттік наградаларымыздың қатарына тағы бір медаль қосылып жатыр. Осының бәрі мен сияқты соғыс және еңбек ардагерлеріне көрсетілген зор ілтипат пен үлкен құрметтің белгісі, — деді ағынан ақтарылған зайсандық қарт жауынгер Зәкен Құрманғожанов.
Салтанатты жиыннан кейін аудан әкімі Алмас Оңдақанов бастаған топ Зайсан қаласының тұрғыны, ұлағатты өмірін жас жеткіншектерді тәрбиелеуге арнаған Бикамал Рақымбаеваның шаңырағында болып ақ жаулықты әжемен жүздесті. Елбасының атынан тыл ардагерінің кеудесіне «Жеңіске 70 жыл» мерекелік медалін тағып, арнайы сыйлықтарын тапсырды.
— Менің замандастарымның жастық шағы қиын-қыстау кезеңнің арпалысымен өтті. Жоқшылықты да, ауыртпалықты да көріп, соған төзімділік танытып есейген ұрпақпыз. Бүгінгі Мемлекет басшысының атынан кеудемізге тағылған медаль — еңбегімізге берілген әділ баға, тыл ардагерлері үшін бұдан асқан бақыт бар ма!? Енді бейбіт өміріміздің аспаны ашық болсын, баршаңызға көп рахмет, — дейді Бикамал әжей.
Сонымен қатар осы күні аудан әкімі Алмас Оңдақанов, аудандық мәслихат хатшысы Дәулет Ыдырышев, қала әкімі Долдан Тожыбаев соғыс және еңбек ардагерлері, қарт жауынгерлер Николай Тимофеевич Гуляевпен, Александр Николаевич Сергеевпен жүздесіп, олардың кеудесіне мерекелік медальдарды тақты.
Ардақты БӨЛДЕКБАЕВА,
«Семей таңы»