Қазақстанда электр энергетикасы саласы стратегиялық маңызға ие. Оның тұрақты әрі тиімді жұмыс істеуі ел экономикасының дамуына тікелей әсер етеді. Осыған байланысты электр желілеріне қосылу тәртібі мен электр энергиясын пайдалану қағидалары заңнамалық деңгейде реттелген. Бұл саладағы негізгі құқықтық база – Қазақстан Республикасының «Электр энергетикасы туралы» Заңы және соған сәйкес қабылданған нормативтік құқықтық актілер.
Электр желілеріне қосылу – тұтынушыларды электр энергиясымен қамтамасыз етудің алғашқы әрі маңызды кезеңі. Рәсім тұтынушының электр желісі ұйымына өтінім беруінен басталады. Өтінімде қажетті қуат көлемі, нысанның орналасқан жері және өзге де техникалық мәліметтер көрсетіледі. Осы негізде электр желісі ұйымы техникалық шарттар ұсынады. Онда қосылу нүктесі, рұқсат етілген қуат және орындалуы міндетті талаптар айқындалады.
Келесі кезеңде тұтынушы техникалық шарттарға сәйкес электрмен жабдықтау жобасын әзірлейді. Жоба қолданыстағы нормаларға сай болуы және уәкілетті органдармен келісуден өтуі тиіс. Одан кейін құрылыс-монтаж жұмыстары жүргізіліп, электр желілері мен жабдықтар орнатылады. Барлық жұмыстар аяқталған соң нысан электр желілеріне қосылып, пайдалануға беріледі.
Заңнамаға сәйкес тұтынушылардың құқықтары мен міндеттері нақты белгіленген. Олар электр желілеріне тең қолжетімділікке, сапалы әрі үздіксіз энергия алуға, сондай-ақ есепке алу құралдарының дұрыстығын талап етуге құқылы. Сонымен қатар техникалық шарттарды орындауға, есеп құралдарын орнатуға және шарт талаптарын сақтауға міндетті.
Өз кезегінде электр энергиясымен жабдықтаушы ұйым тұтынушылардың өтінімдерін уақтылы қарауға, негізделген техникалық шарттар беруге және электрмен жабдықтаудың сенімділігі мен сапасын қамтамасыз етуге тиіс. Барлық тұтынушылар үшін кемсітусіз қолжетімділік қағидаты сақталуы қажет.
Электр энергетикасы саласындағы заң талаптарын бұзу әкімшілік жауапкершілікке әкеледі. Сонымен бірге келтірілген залалды өтеу қажет болады, ал кей жағдайда электр энергиясын беру шектелуі немесе толық тоқтатылуы мүмкін.
Қазақстан Республикасы Энергетика министрлігі Мемлекеттік энергетикалық қадағалау және бақылау комитетінің Абай облысы бойынша аумақтық департаменті ҚР «Электр энергетикасы туралы» Заңының 6-бабының 4-тармағына сәйкес, энергетикалық жабдықтарды қауіпсіз пайдалану, электр энергиясын өндіру мен жеткізудің сенімділігі, сондай-ақ қызметкерлердің қауіпсіздік талаптарын сақтауына бақылау жүргізеді.
Өңір тұрғындары электр энергетикасы саласындағы заң бұзушылықтар бойынша арыз-шағымдарын немесе ұсыныстарын аталған департаментке — Семей қаласы, Мәңгілік Ел көшесі, 9-үй, 605-кабинет мекенжайына жолдай алады. Өтініштер сондай-ақ 8 (7222) 56-50-24, 8 (7222) 56-50-25 байланыс нөмірлері арқылы немесе «Е-Өтініш» ақпараттық жүйесі арқылы қабылданады.
Департамент басшылығы азаматтарды апта сайын сәрсенбі және жұма күндері сағат 16:00-ден 17:00-ге дейін жеке қабылдайды.
«Қазақстан Республикасы Энергетика министрлігі
Мемлекеттік энергетикалық қадағалау және бақылау комитетінің
Абай облысы бойынша аумақтық департаменті» РММ
