Semeytany.kz — Абай облысында Алакөл жағалауын дамыту және 2026 жылдың жазғы маусымына дайындық мәселелері арнайы жиында қаралды. Облыс әкімі Берік Уәлидің төрағалығымен өткен басқосуда өңірдегі туристік инфрақұрылымды жаңғыртуға бағытталған 2026-2028 жылдарға арналған жол картасы бекітілді.
Жиында туризм басқармасының басшысы Бекжан Бапышев, Мақаншы ауданының әкімі Дәурен Қойгелдин және Цифрлық технологиялар басқармасы басшысының міндетін атқарушы Қаламқас Жұмағалиқызы Алакөл жағалауындағы маңызды жобалардың орындалу барысы мен алдағы міндеттер жөнінде баяндама жасады.
Бекітілген құжат өңірдің туристік әлеуетін арттыруға және жағалаудағы инфрақұрылымды кешенді түрде дамытуға бағытталған. Жоспарға сәйкес, Алакөл жағалауын дамытуға арналған бас жоспар әзірленіп, инженерлік инфрақұрылым кезең-кезеңімен жаңартылады. Атап айтқанда, электр желілері тартылып, су және кәріз жүйелері салынады, тазарту қондырғылары орнатылып, жағалау нығайтылады. Сонымен бірге санитарлық тораптар қойылып, аумақ жарықтандырылады.
Қауіпсіздік мәселесіне де айрықша мән беріліп отыр. Биыл көл жағалауына жасанды интеллектпен интеграцияланған 115 бейнекамера орнату жоспарланған. Оның 22-сі тікелей жағалау сызығында қауіпсіздікті қамтамасыз ету үшін қойылады. Бұдан бөлек, барлық нысанды жоғары жылдамдықты интернетпен қамту және талшықты-оптикалық байланыс желісін тарту көзделген.
Жол картасында жолдарды жөндеу, қоғамдық көлік қозғалысын ұйымдастыру, келушілерге арналған орталық салу, инвестор тарту және мәдени-туристік іс-шаралар өткізу де қарастырылған. Бұл бастамалар Алакөлдің туристік тартымдылығын арттырып қана қоймай, демалушылар үшін жайлы орта қалыптастыруға мүмкіндік береді.
Жиында облыс әкімі шомылу маусымына екі айдай ғана уақыт қалғанын айтып, тиісті басқармалар мен Мақаншы ауданы әкімдігіне барлық жұмысты жеделдетуді тапсырды. Аймақ басшысы инфрақұрылымды дамыту, қауіпсіздік пен тазалықты сақтау, қызмет көрсету сапасын арттыру бағытындағы шаралар нақты жоспармен жүзеге асуы тиіс екенін атап өтті.
Берік Уәлидің айтуынша, бұл мәселе Мемлекет басшысы мен Үкіметтің ерекше бақылауында. Сондықтан әрбір жауапты құрылым өз міндетін нақты айқындап, мерзімі мен жауапты тұлғаларын белгілеуі қажет. Облыс басшысы негізгі мақсат жазғы туристік маусымды талапқа сай өткізу ғана емес, Алакөлдің туристік әлеуетін сапалы жаңа деңгейге көтеру екенін жеткізді.
