Биыл Жеңістің 70 жылдық мерекесін үлкен қуанышпен атап өткелі отырмыз. Бүгінде ардагер ата-әжелеріміздің ерліктері, қаһармандық істері мен ерен еңбектерінің алдында өскелең ұрпақ мәңгілік қарыздар. Осы орайда Үржар ауданында да ардагерлерді ардақтау шарасы қызу қарқынмен басталып, өз мәнінде жалғастық табуда.
{jcomments on}Бұл орайдағы шараларды аудан әкімі Серік Зайнулдин назарда ұстап отыр. Ауданда соғыс жылдарында тылда еңбек еткен жандар көп. Демек, оларды ардақтауға арналған шараларға да басымдық беру керек.
Жуырда Үржар орталығындағы аудандық Мәдениет үйінде ерекше шара болып өтті. Тыл ардагерлеріне «Жеңіске 70 жыл» медалін беру құрметіне арналған салтанатты жиынға жұртшылық көп жиналды.
Мерекелік басқосу барысында Үржар ауданы әкімінің орынбасары С.Садуақасов соғыс жылдарындағы балалық шағын ауыр еңбекке арнаған жандарға арнап құттықтау сөз сөйледі.
— Бүгінгі аға буын өкілдері, біздің құрметті әке-шешелеріміз, сол бір жылдарда еліміздің еңсесін тіктетіп, әлеуеттілігін арттыру жолында жанкешті еңбек етті. Жеңісті жақындатуға елеулі үлес қосты. Оларға айтылар алғыс зор. Бүгінде Жеңістің 70 жылдығының құрметіне аудан көлемі бойынша 654 адамды құттықтап отырмыз. Соның ішінде Үржар өңірі бойынша 195 адам тыл еңбеккері санатында екен. Бүгінгі ашық аспанның астында бейбіт өмір сүріп жатқанымыз сіздердің кешегі еселі еңбектеріңіздің жемісті нәтижесі. Сіздерге зор денсаулық тілейміз, бала-шағаларыңыздың қызығын көріңіздер, — деп, аудан әкімі Серік Зинабек-ұлының ыстық сәлемін жеткізді.
Салтанатты шараның соңы аудандық Мәдениет үйі өнерпаздарының концерттік бағдарламасымен жалғасты.
Бауыржан ЖАҚЫП,
«Семей таңы»