Semeytany.kz — Абай облысының орталығы Семей қаласында заманауи спорт кешені салынбақ. Жоба «Абайға құрмет» акциясы аясында жүзеге асырылады.
Жаңа нысанның құрылысы Мемлекет басшысы Қасым-Жомарт Тоқаевтың қолдауымен басталған бастама шеңберінде қолға алынған. Жобаны «Самұрық-Қазына» АҚ-ның бірыңғай операторы Samruk-Kazyna Trust қаржыландырады.
Жоспарға сәйкес, спорт кешені қаланың оң жағалауында, Сәтбаев көшесі бойында салынады. Екі қабатты ғимараттың жалпы аумағы 2 мың шаршы метрді құрайды. Нысанда әртүрлі спорт түрлеріне арналған залдар, 100 көрерменге арналған трибуна, күрес және бокс залдары, тренажер залы мен қосалқы бөлмелер болады.
Кешенде лифт те қарастырылған. Соның арқасында екінші қабатқа барлық келушілер, оның ішінде мүмкіндігі шектеулі жандар да еркін көтеріле алады.
Жобаны іске асыруға шамамен 1,6 миллиард теңге бөлінген. Құрылыс жұмыстары келесі жылы аяқталады деп жоспарланып отыр. Осындай спорт кешендері Ақтөбе, Арқалық және Қонаев қалаларында да салынбақ.
Сонымен қатар, биыл Samruk-Kazyna Trust арқылы еліміздің бірнеше өңірінде ерекше қажеттіліктері бар балалар мен ересектерге арналған инклюзивті спорт орталықтарының құрылысы басталуы мүмкін. Бұл орталықтарда бейімделген спорт залдары, бассейн, медициналық және физикалық оңалту бөлмелері, оқу және әлеуметтену аймақтары, сондай-ақ қонақүй бөлмелері болады деп жоспарланған.
Қазіргі таңда қор құрамындағы компаниялар атынан елімізде 19 спорт кешені жұмыс істеп тұр. Олар 700 мыңнан астам адамның спортпен тұрақты айналысуына мүмкіндік беріп отыр.
