Semeytany.kz – Абай облысының әкімі Берік Уәли Бесқарағай ауданындағы Бозтал ауылына барып, қар суының жай-күйімен және суды бұру бағытында атқарылып жатқан жұмыстармен танысты.
Аймақ басшысы даладан келген еріген қар суының деңгейін төмендету шараларын көріп, су ағып жатқан арналарды аралады. Сондай-ақ елді мекендегі мектеп ғимаратында орналасқан жедел штабтың жұмысымен танысты.
Қазіргі таңда Бозтал ауылындағы жағдай тұрақты. Ресми мәліметке сүйенсек, елді мекенде тұрғын үйлерді су басу дерегі тіркелмеген.
Қауіпсіздік мақсатында ауылда 80 орынға арналған уақытша орналастыру пункті дайындалған. Алайда әзірге онда ешкім көшірілмеген, тұрғындардың барлығы өз үйлерінде отыр.
Төтенше жағдайлар департаменті мен жергілікті атқарушы органдар еріген қар суын қауіпсіз өткізу үшін қажетті инженерлік жұмыстарды жүргізіп жатыр. Бұл іске жеткілікті көлемде техника мен жеке құрам жұмылдырылған. Былтыр жоспар аясында ауылдың бойымен ұзындығы 1800 метр болатын ор қазылып, топырақ үйіндісі жасалған. Қазір су сол арнамен ағып жатыр.
Мамандардың мәліметінше, тұрғындардың өмірі мен денсаулығына қауіп төніп тұрған жоқ. Көлік қатынасы да үзілген емес. Жедел әрекет ету үшін ТЖД мен жергілікті атқарушы органдардан 69 адам және 18 техника тартылған. Бұған қоса, 200 қап инертті материал дайындалған.
Төтенше жағдайлар департаментінің хабарлауынша, 1 сәуір күні таңғы сағат 08:00-дегі жағдай бойынша су деңгейі 40-50 сантиметрге төмендеген.
Облыс әкімі жауапты мекемелерге су деңгейін тұрақты бақылауда ұстауды, ең алдымен тұрғындардың қауіпсіздігін қамтамасыз етуді және үйлерге су кіруіне жол бермеуді тапсырды. Сондай-ақ аудандағы тасқын қаупі бар өзге елді мекендерді де назардан тыс қалдырмауды ескертті.
Берік Уәлидің айтуынша, ауылға келген су бұрыннан бар табиғи арналар арқылы ағып жатыр. Оның сөзінше, қазіргі ең маңызды мәселе – тұрғын үйлердің амандығын сақтау, ал жалпы жағдай толық бақылауда.
