Semeytany.kz – Абай облысының әкімі Берік Уәли Германияның Инцель қаласында өткен жасөспірімдер арасындағы конькимен жүгіруден әлем чемпионатында топ жарған спортшылармен кездесті.
Кездесу барысында аймақ басшысы жас чемпиондар мен олардың жаттықтырушысына алғыс айтып, алдағы жарыстарда да табыс тілейтінін жеткізді. Оның айтуынша, бүгінде мемлекет тарапынан бұқаралық спортты дамытуға, әсіресе балалар мен жасөспірімдер спортын қолдауға ерекше мән беріліп отыр.
Облыс әкімі Қасым-Жомарт Тоқаевтың тапсырмалары аясында өңірде спорт инфрақұрылымын дамыту және талантты жастарды қолдауға бағытталған жұмыстар жүйелі түрде жүргізіліп жатқанын атап өтті. Спортшылардың жетістігі – осы еңбектің нақты нәтижесі екені айтылды.
Шара барысында әлем чемпиондары Вадим Чебардаков пен Анастасия Беловодоваға, сондай-ақ олардың жеке бапкері Ильмира Хамитоваға құрмет көрсетіліп, облыс әкімінің алғыс хаты мен арнайы сертификат табысталды. Жаттықтырушы «Абай облысына сіңірген еңбегі үшін» төсбелгісімен марапатталды.
Нақтырақ айтқанда, Вадим Чебардаков масс-старт жарысында 5:29.87 уақыт көрсеткішімен мәреге бірінші жетіп, алтын медаль иеленді. Ал қыздар арасындағы командалық спринтте Қазақстан құрамасы жеңіске жетіп, әлем чемпионы атанды. Осы құрамда өнер көрсеткен Анастасия Беловодова да алтын жүлдеге ие болды.
Қазіргі уақытта спортшылар алдағы ірі халықаралық жарыстарға, соның ішінде Азия ойындарына дайындықты бастап кеткен.
