Semeytany.kz — Абай облысының әкімі Берік Уәли Семей қаласындағы жол жөндеу жұмыстарының барысымен танысып, биыл шаһарды абаттандыруға ерекше басымдық берілетінін мәлімдеді.
Қазір облыс орталығындағы бірнеше көшеде ағымдағы жөндеу жүріп жатыр. Қаладағы жолдар ретке келтіріліп, асфальт төсеу жұмыстары кезең-кезеңімен қолға алынған.
Ресми мәліметке сүйенсек, Семейде жалпы ұзындығы 756 шақырымды құрайтын 1179 көше бар. Абай облысы құрылғанға дейін қалалық жолдардың тек 36 пайызы ғана асфальт-бетон жабындысымен қамтылған. Ал 2025 жылдың қорытындысында бұл көрсеткіш 50 пайызға жеткен. Осы бағыттағы жұмысты жалғастыру үшін 2026 жылға арналған кешенді жоспар әзірленген.
Өңір басшысы Міржақып Дулатов пен Қайым Мұхамедханов көшелерінің қиылысындағы жол жөндеу жұмыстарын арнайы барып көрді. Ол мердігер ұйымдарға жұмысты сапалы әрі уақытында аяқтауды тапсырды. Сондай-ақ жолаушылар көлігі және автомобиль жолдары басқармасына, қала әкімдігіне және Ұлттық сапа орталығының мамандарына жол сапасын тұрақты бақылауда ұстау міндетін жүктеді.
Берік Уәлидің айтуынша, биыл Семейде бұрын-соңды болмаған көлемде абаттандыру жұмыстары жүргізіледі. Әсіресе, осыған дейін асфальт төселмеген көшелер мен аула аумақтарына басымдық беріледі.
Облыс әкімі биыл 100 көшеге орташа жөндеу жүргізіліп, 100 аулаға асфальт төселетінін айтты. Бұдан бөлек, 100 аула абаттандырылып, 100 көше жарықтандырылмақ. Оның сөзінше, мұндай ауқымды жұмыс қалада бұрын болмаған.
Аймақ басшысы жол сапасына тек жауапты органдар ғана емес, қоғам да бақылау жасауы керек екенін атап өтті. Осыған байланысты қоғамдық кеңес мүшелері мен партия өкілдерін де бұл іске белсенді араласуға шақырды.
